ՀԱՅԿԱԿԱՆ ԸՆՏՐԱՆԻԻՆ ԺԱՄԱՆՈՒՄԸ

Թուրքիոյ եւ Հայաստանի ֆութպոլի ազգային հաւաքականներու միջեւ վաղը հանդիպում մը տեղի պիտի ունենայ Էսկիշեհիրի մէջ։ Հայկական ընտրանին այսօր արդէն ժամանած է Թուրքիա։ 2024 թուականի Եւրոպայի ֆութպոլի առաջնութեան որակաւորման փուլի հանդիպումներու շրջանակին մէջ տեղի կ՚ունենայ մրցումը, որուն հետաքրքրութեամբ կը սպասեն մարզասէրները։ «Եւրօ 2024»ի որակաւորման D խմբակի հանդիպումներու 5-րդ փուլին մաս պիտի կազմէ վաղուան խաղը։

Հայկական մարզական պատուիրակութիւնը կ՚իջեւանի Էսկիշեհիրի «Ռատիսըն» պանդոկին մէջ։ Այսօր երեկոյեան ժամերուն նախատեսուած են Թուրքիոյ ազգային հաւաքականի աւագ մարզիչ Սթեֆան Քունցի եւ Հայաստանի ազգային հաւաքականի աւագ մարզիչ Օլեքսանտր Փեթրաքովի մամլոյ ասուլիսները։ Հայկական ընտրանին պարապմունք մըն ալ կ՚իրականացնէ այն մարզադաշտին վրայ, ուր վաղը նախատեսուած է խաղը։ Պարապմունքի սկիզբին հետեւելու հնարաւորութիւն պիտի ունենան զանգուածային լրատուութեան միջոցներու ներկայացուցիչները։

Հայաստանի հաւաքականի մարզիկները ընկերային ցանցերու վրայ տեսանիւթեր զետեղած են՝ իրենց ուղեւորութեան սկզբնական փուլէն։