«AZ» ԳԻՐՔԻ ՇՆՈՐՀԱՆԴԷՍԸ

Վաքըֆներու խորհուրդի մօտ փոքրամասնութեանց ներկայացուցիչի գրասենեակի քարտուղար Մութեպեր Եըլմազճան-Սիմոնեթթի այս շրջանին հեղինակած է «AZ» անուն գիրք մը, որ բաւական հետաքրքրական է ու կը համարուի եզակի՝ իր նմաններու շարքին։ Թուրքիոյ ոչ-իսլամ փոքրամասնական համայնքներու գործիչներու հետ հարցազրոյցներ կը պարունակէ այս գիրքը, որուն լոյս ընծայած է «Սանտեր» հրատարակչութիւնը։

Երէկ երեկոյեան, Ենիգիւղի Այա Նիքոլա յունաց եկեղեցւոյ յարակից սրահին մէջ տեղի ունեցաւ այս գիրքին շնորհանդէսը։ Հեղինակը ջերմօրէն շրջապատուեցաւ գինեձօնի ընթացքին, որու յայտագիրը գործադրուեցաւ ոգեւոր մթնոլորտի մը մէջ։ Հանդիսութեան սկիզբին ողջոյնի խօսքով մը հանդէս եկաւ հիւրընկալ եկեղեցւոյ վարչական խորհուրդէն Նիքոս Քալամարիս։ Աւելի վերջ Վաքըֆներու խորհուրդի մօտ փոքրամասնութեանց այժմու ներկայացուցիչ Ճան Ուսթապաշը, ինչպէս նաեւ նախկին ներկայացուցիչներէն Թորոս Ալճան եւ Լաքի Վինկաս հանդէս եկան ելոյթներով, որոնց ընթացքին թէ՛ ծանօթացուցին գիրքը եւ թէ ներկայացուցին իրենց արժեւորումները։ Մութեպեր Եըլմազճան-Սիմոնեթթին ալ արտայայտուեցաւ գիրքի բովանդակութեան ու պատրաստութեան փուլերուն շուրջ, նաեւ շնորհակալութիւն յայտնեց բոլոր անոնց, որոնք իրենց նպաստը բերած էին այս նախագիծը կեանքի կոչելու ճանապարհին։ Ան նշեց, որ գիրքը հեղինակելու գաղափարը յղացած էր համավարակի շրջանին եւ ինքը թէեւ գործի ենթական չէ, սակայն ընդգրկուած է անոր մէջ ու կը մաղթէ, որ իր հեղինակած աշխատանքը հասանելի ըլլայ լայն զանգուածներու։ Միւս ատենախօսներն ալ գոհունակութիւն յայտնեցին այսպիսի գիրքի մը հրատարակութեան կապակցութեամբ՝ մանաւանդ, որ անոր հեղինակին հետ աշխատանքային յարաբերութիւն ունեցած էին։ Բոլորն ալ համոզուած էին, թէ այս գիրքը յառաջիկային կրնայ վերածուիլ աղբիւրի մը՝ իր ընդգրկած կալուածին վերաբերեալ։

Յայտագրի գործադրութենէն վերջ Նիքոս Քալամարիս յուշանուէր մը յանձնեց Մութեպեր Եըլմազճան-Սիմոնեթթիին։

Հուսկ, սարքուեցաւ ընդունելութիւն մը, որու ընթացքին շնորհանդէսի մասնակիցները առիթն ունեցան ջերմ մթնոլորտի մը մէջ զրուցելու հեղինակին հետ, որուն յղեցին նաեւ իրենց շնորհաւորութիւնները։

Շաբաթ, Սեպտեմբեր 30, 2023