ԵՐԵՒԱՆԻ ՄԷՋ ՕՏԱՐԵՐԿՐԵԱՅ ԴԵՍՊԱՆՆԵՐ ԱՅՑԵԼԵՑԻՆ ՄԱՏԵՆԱԴԱՐԱՆ

Երեւանի մօտ հաւատարմագրուած խումբ մը դեսպաններ վերջերս այցելեցին Մատենադարան, ուր կատարեցին շրջայց մը, որու ընթացքին ծանօթացան մշտական ու ժամանակաւոր ցուցադրութիւններուն։ Օտարերկրեայ դիւանագէտները մասնաւոր ուշադրութեան առարկայ դարձուցին Մատենադարանի վերականգնման բաժինն ու արխիւային վաւերագրերու պահոցը։ Քննարկուեցան համատեղ ծրագրերու իրականացման հնարաւորութիւնները։

«Արմէնփրէս»ի հաղորդումներով, հիւր դեսպաններուն ուղեկցեցան Մատենադարանի տնօրէն Արա Խզմալեան եւ փոխ-տնօրէն Վահէ Թորոսեան։