ԽԱՉԱՏՈՒՐԵԱՆ ԱՇԽԱՊԱՏԻ ՄԷՋ

Հայաստանի Հանրապետութեան նախագահ Վահագն Խաչատուրեան այս օրերուն աշխատանքային այցելութիւն մը կու տայ Աշխապատ, ուր երէկ դիմաւորուեցաւ Թիւրքմենիստանի փոխ-վարչապետ Մեհմետհան Չաքի եւ Պերտի Մուրատի կողմէ։ Նախագահ Խաչատուրեանի գլխաւորած պատուիրակութեան կազմին մէջ կը գտնուի նաեւ Հայաստանի արտաքին գործոց փոխ-նախարար Մնացական Սաֆարեան։ Աշխապատի օդակայանին մէջ Վահագն Խաչատուրեանը դիմաւորուեցաւ Թիւրքմենիստանի հայ համայնքէն երկու փոքրիկներու կողմէ, որոնք անոր աղ ու հաց հրամցուցին՝ ըստ հայկական աւանդութեան։

Պաշտօնական աղբիւրներու հաղորդումներով, Աշխապատի մէջ նախատեսուած է նաեւ Վահագն Խաչատուրեանի հանդիպումը Թիւրքմենիստանի նախագահ Սերտար Պերտիմուհամմետովի հետ։ Նախագահը կեցութեան օրերուն կը մասնակցի թիւրքմեն բանաստեղծ Ֆրակիի 300-ամեակին նուիրուած միջազգային յոբելենական համաժողովին։

Ուրբաթ, Հոկտեմբեր 11, 2024