ԵՕԹՆԱՄԵԱՅ ԱՆԻ ՄԵԼԻՔԵԱՆ ՄԻՋԱԶԳԱՅԻՆ ՄՐՑՈՅԹԻ ԱՌԱՋԻՆ ԲԱՑԱՐՁԱԿ ԴԱՓՆԵԿԻՐ

Հայաստանէն եօթնամեայ դաշնակահարուհի Անի Մելիքեան արժանացաւ երիտասարդ դաշնակահարներու միջազգային առաջին բացարձակ մրցանակին։ Իտալիոյ Պարի քաղաքին մերձակայ Աքուաւիւա տելէ Ֆոնթիի մէջ տեղի ունեցաւ երիտասարդ երաժիշտներու «Colafemmina Piano» ութերորդ միջազգային մրցոյթը։ Առաջին անգամ մրցոյթը այս տարի ունեցաւ նաեւ Հայաստանէն մասնակից մը։ Այսպէս, Երեւանի «Չայքովսքի» երաժշտական դպրոցի երկրորդ դասարանի սանուհի Անի Մելիքեան մասնակցութիւն բերաւ այս կարեւոր մրցաշարքին։ Արդիւնքին, ան յաջողեցաւ դաշնակահարներու անուանակարգի առաջին բացարձակ մրցանակին տիրանալ։

Հայկական լրահոսին մէջ լայն արձագանգ ստեղծեց այս յաջողութիւնը՝ մինչ պատանի դաշնակահարուհիին ամէն կողմէ շնորհաւորութիւններ կը տեղան։

Հարկ է նշել, որ յիշեալ միջազգային մրցոյթը ութերորդն է իր նմաններու շարքին։

Երեքշաբթի, Հոկտեմբեր 15, 2024