«ՄԱՀԱՑՈՂԸ ՄԵՆՔ ԵՆՔ, ՀԱՇՏՈՒՈՂԸ՝ ԴՈՒՔ»

Ամերիկայի Միացեալ Նահանգներու եւ Ռուսաստանի միջեւ՝ Ուքրայնայի պատերազմին շուրջ Սէուտական Արաբիոյ մէջ տեղի ունեցած բանակցութիւններու արձագանգները կը շարունակուին։ Ուքրայնայի նախագահ Վոլոտիմիր Զելենսքի, որ նոյն օրը Թուրքիա այցելեց, կը շարունակէ բուռն ձեւով հակազդել այդ բանակցութիւններուն դէմ, որոնցմէ անմասն մնացած էր։

Զելենսքի Թուրքիա այցելութեան օրերուն հարցազրոյց մը տուաւ «Հիւրրիյէթ» օրաթերթին։ Ան այս առթիւ ըսաւ. «Մահացողը մենք ենք, հաշտուողը՝ դուք»։ Իր խօսքով՝ Քիեւի ղեկավարութիւնը կը փափաքի, որ պատերազմը շուտով վերջանայ եւ արդար ու մշտական խաղաղութիւն մը հաստատուի։ «Մենք չենք փափաքիր Սուրիա դառնալ», ըսաւ Զելենսքի եւ աւելցուց, որ իրենց դիտարկմամբ՝ ԱՄՆ քաղաքական մեկուսացումէ դուրս կը բերէ Ռուսաստանի նախագահ Վլատիմիր Փութինը։

«Պատերազմը Ուքրայնոյ մէջ կ՚իրականանայ։ Փութին կը սպաննէ ո՛չ թէ ամերիկացիները կամ եւրոպացիները, այլ՝ ուքրանացիները։ Առանց մեզի բանակցային սեղան չի կրնար ըլլալ», յայտնած է ան։

Ի՞ՆՉ Կ՚ԸՍԷ ԹՐԱՄՓ

Միւս կողմէ, ԱՄՆ-ի նախագահ Տանըլտ Թրամփ կը թիրախաւորէ Զելենսքին, որ բողոք կը յայտնէ բանակցային սեղանէ դուրս թողուած ըլլալու պատճառով։ «Կը լսեմ, թէ սեղանի շուրջ ներկայ չեղած ըլլալու համար ցաւ կը յայտնեն։ Իրականութեան մէջ սեղանի շուրջ էին երեք տարիէ ի վեր, նոյնիսկ աւելի վաղուց։ Սա կրնար շատ հարթ ձեւով լուծուիլ։ Կրնայիր համաձայնութեան մը հասնիլ», նշեց Թրամփ։