ԲԱՑԱՌԻԿ ՀՆԱՐԱՒՈՐՈՒԹԻՒՆ

Ամերիկեան «Newsweek»ը վերջերս տեղեկացուց, թէ Ամերիկայի Միացեալ Նահանգներու նախագահ Տանըլտ Թրամփ ունի Ատրպէյճանը պատասխանատուութեան ենթարկելու բացառիկ հնարաւորութիւնը. բան մը, որ չըրաւ նախկին նախագահ Ճօ Պայտըն։ «Newsweek»ը յիշեցուցած է անցեալ հոկտեմբերին, նախագահական քարոզարշաւի եռուն շրջանին, Թրամփի կողմէ ընկերային ցանցերու վրայ կատարուած յայտարարութիւնը, ըստ որու՝ նախկին փոխ-նախագահ Քամալա Հարիս ոչինչ ըրաւ, երբ 120 հազար հայ քրիստոնեայ սարսափելի հալածանքներով ու բռնութեամբ տեղահանութեան ենթարկուեցաւ Արցախէն։

Սոյն գրութիւնը ստորագրած է սիւնակագիր Սթեֆան Փեշտիմալճի, որ ամերիկահայ հասարակութեան հետ կապերու փորձագէտ է։ Ան շեշտած է, որ Ատրպէյճան վերջին չորս տարիներուն կը փորձէ Հայաստանը ոչնչացնել եւ վերջ տալ անոր գոյութեան Հարաւային Կովկասի մէջ։ Յօդուածին մէջ արծարծուած են՝ «Զանգեզուրի միջանցք»ի հարցը, հայկական պատմամշակութային ժառանգութեան ոչնչացումը, Պաքուի հայ պատանդներու եւ գերիներու խնդիրները, եւ այլ։ Ըստ սիւնակագրին՝ ռազմական յանցագործութիւններու եւ վայրագութիւններու համար Ատրպէյճանը պատասխանատուութեան ենթարկելու տեսակէտէ Պայտընի անընդունակութիւնը բիծ մը դառնայ անոր քաղաքական ժառանգութեան վրայ։

Ըստ «Newsweek»ի՝ Թրամփ կրնայ պահանջել Ատրպէյճանի զօրքերու դուրս բերուիլը Հայաստանէն եւ հայերու Արցախ վերադարձը։ Ան կրնայ պահանջել նաեւ ազատ արձակել բոլոր հայ բանտարկեալները։ Թրամփ կրնայ աւելի շատ թափանցիկութիւն եւ անձնական ներգրաւուածութիւն ապահովել խաղաղութեան գործընթացին։ Յօդուածին մէջ շեշտուած է, թէ խաղաղութիւն չի կրնար ըլլալ՝ առանց պատասխանատուութեան։