ԱՐԴԱՐ ԵՆԹԱԳԵՏԻՆ

Մինչ Ուքրայնայի պատերազմի երրորդ տարելիցն է, Թուրքիա կը շարունակէ Ռուսաստանի հետ սերտօրէն աշխատիլ հակամարտութեան կարգաւորման հեռանկարներուն շուրջ։ Ամերիկայի Միացեալ Նահանգներու կողմէ վերջին շրջանին կատարուած նախաձեռնութիւններու մթնոլորտին մէջ Թուրքիա շարունակ կ՚ընդգծէ պատերազմին վերջ տալու համար արդար ենթագետնի մը ձեւաւորման անհրաժեշտութիւնը։ Անգարա Մոսկուայի եւ Քիեւի հետ սերտ կապեր կը պահէ եւ կը փորձէ զանոնք ծառայեցնել նաեւ Ուաշինկթընի նոր նախաձեռնութիւններուն ի նպաստ խթանի մը վերածել։

Հանրապետութեան նախագահ Ռեճեփ Թայյիպ Էրտողան երէկ Պեշթեփէի համալիրին մէջ հիւրընկալեց Ռուսաստանի արտաքին գործոց նախարար Սերկէյ Լաւրովը, որ շփումներ ունեցաւ Անգարայի մէջ։ Էրտողան-Լաւրով տեսակցութեան ներկայ էին արտաքին գործոց նախարար Հաքան Ֆիտան, Հանրապետութեան նախագահութեան հաղորդակցութեան բաժանմունքի ղեկավար Ֆահրետտին Ալթուն եւ արտաքին քաղաքակութեան ու անվտանգութեան գծով աւագ խորհրդական դեսպան Աքիֆ Չաղաթայ Քըլըչ։

Ուքրայնայի պատերազմը արդէն թեւակոխած է չորրորդ տարին։ Այս մթնոլորտին մէջ Թուրքիա շարունակ կապի մէջ է թէ՛ հակամարտ կողմերուն եւ թէ շահագրգիռ բոլոր միջազգային դերակատարներուն հետ։ Այս հանգամանքը երէկ ի յայտ եկաւ Լաւրովի Անգարայի շփումներուն ժամանակ։ Հաքան Ֆիտան հերթական անգամ կրկնեց, որ Թուրքիա պատրաստակամ է տանտէր ըլլալու՝ հաշտութեան բանակցութիւններուն։ Իր կարգին, Սերկէյ Լաւրովն ալ յիշեցուց, որ Թուրքիոյ հիւրընկալմամբ կազմակերպուած բանակցութիւններու ընթացքին նախապէս ուրուագծուած էր խաղաղութեան հորիզոն մը, սակայն, վերջնական խաղաղութիւնը խոչընդոտուած էր Լոնտոնի կողմէ՝ ի դէմս Անգլիոյ այդ շրջանի վարչապետ Պորիս Ճանսընի։

Թէ՛ նախագահ Էրտողան եւ թէ նախարար Ֆիտան Լաւրովի այցելութեան զուգահեռ ընդգծեցին, որ բանակցային սեղանէն պէտք չէ բացակայի Ուքրայնան։ Թրքական կողմը կը ձգտի, որ այժմու նոր գործընթացը վերագրուի մշտական խաղաղութեան մը եւ պատրաստակամութիւն կը յայտնէ այս ուղղութեամբ ամբողջական աջակցութիւն ցուցաբերելու։

Իր կարգին, Լաւրովն ալ երէկ յայտնեց, որ Ռիատի մէջ ԱՄՆ-ի հետ տեղի ունեցած բանակցութիւններուն ժամանակ ի յայտ եկած են տարբեր տեսակէտներ։ Ռուս նախարարը դիտել տուաւ, որ պիտի շարունակեն շփման մէջ մնալ իրենց ամերիկացի գործընկերներուն հետ։ Ան յոյս յայտնեց, թէ այս անգամ արհեստական խոչընդոտներ չեն ստեղծուիր։ Լաւրով պնդեց, որ ռուսական կողմը փոփոխութեան չէ ենթարկած իր դիրքորոշումը, սակայն, թէ՛ Քիեւ եւ թէ Եւրոպայի երկիրները յաճախիկօրէն փոփոխութեան կ՚ենթարկեն իրենց տեսակէտները։ «ԱՄՆ-ի մօտեցումը հաւասարակշռուած է։ Շատ կարեւոր է, որ Ուքրայնա չանդամակցի ՆԱԹՕ-ին։ Ռազմական գործողութիւնը կրնայ կանգ առնել, երբ բանակցութիւններուն մէջ ի յայտ գայ արդիւնք մը, որ կրնայ մեզ բաւարարել», ըսաւ Լաւրով։