ՅՍՏԱԿ ՊԱՏԿԵՐԱՑՈՒՄՆԵՐ

Հայաստանի վարչապետ Նիկոլ Փաշինեան յայտարարեց, որ Ատրպէյճանի հետ ենթադրեալ խաղաղութեան պայմանագրի նախագծի չհամաձայնեցուած երկու կէտերուն վերաբերեալ կացութիւնը կը մնայ նոյնը. այս պահուն կարելի չէ եղած համաձայնութեան մը հասնիլ։ Վարչապետը համոզուած է, թէ ներկայիս տարածաշրջանէն ներս պատերազմի կամ նոր մագլցումի մը ո՛չ պատճառ կայ, ո՛չ նախադրեալ եւ ոչ ալ հիմնաւորում գոյութիւն ունի։ Փաշինեան դիտել տուաւ, որ այդ չհամաձայնեցուած երկու խնդիրներէն մին կը վերաբերի սահմանի երկայնքով երրորդ երկիրներու ուժերու տեղակայման։ Միւս խնդիրը կը վերաբերի՝ միջազգային ատեաններ տեղափոխուած իրաւական եւ այլ վէճերուն։

«Արմէնփրէս»ի հաղորդումներով, Հայաստանի Ազգային ժողովէն ներս ունեցած ելոյթին ժամանակ Փաշինեան կրկնեց, որ հայկական կողմը տարածաշրջանային ապաշրջափակման լուծումները կը պատկերացնէ փոխադարձութեան սկզբունքով։ «Հայաստանի երկաթուղային ցանցի ամբողջականութիւնը կ՚ապահովուի Նախիջեւանի տարածքով։ Այս համատեսքին մէջ պէտք է ընկալենք ամբողջը», ըսաւ վարչապետը։ «Ազատութիւն» ռատիոկայանի հաղորդումներով, Հայաստանի ընդդիմութիւնը թերահաւատութեամբ կը վերաբերի վարչապետի՝ փոխադարձութեան սկզբունքին վերաբերեալ արտայայտութիւններուն։

Երեւանի եւ Պաքուի միջեւ վերջին օրերուն փոխանակուեցան խաղաղութեան պայմանագրի նախագծին վերաբերեալ առաջարկներ։ Վարչապետ Փաշինեան համոզուած է, թէ հերթական առաջարկներու փոխանակումը վկայութիւն մըն է, որ հաշտութեան գործընթացը փակուղիի չէ մատնուած։

Բաց աստի, Հայաստանի փոխ-վարչապետ Մհեր Գրիգորեան յայտնեց, որ համաձայնութիւն կայ, որպէսզի Ատրպէյճանի հետ սահմանազատման յանձնաժողովներու հանդիպումները ըլլան խտացեալ։ Փոխ-վարչապետը աւելցուց, որ սահմանազատման գործընթացը պիտի շարունակուի հիւսիսային անկիւնէն սկսեալ։ Մհեր Գրիգորեան դիտել տուաւ, որ յառաջիկային յանձնաժողովներու հանդիպում մը պէտք է տեղի ունենայ, սակայն, չնշեց թուականը։ Ան ընդգծեց, որ համապատասխան ամբողջ տեղեկատուութիւնը հրապարակային է։