ԼՌՈՒԹԻՒՆԸ ՄԻՋՈՑ ԶԱՍՏՈՒԱԾ ԳՏՆԵԼՈՒ

Հակառակ այն փաստին, որ այսօրուան մարդը իր ձեռքին տակ բազմաթիւ եւ բազմապիսի հնարաւորութիւններ ունի, հակառակ այն իրողութեան, որ այսօրուան մարդուն համար այլեւս տիեզերքն ու ովկիանոսին խորերը այսպէս կամ այնպէս հասանելի են, հակառակ այն իրականութեան, որ այսօրուան մարդը գիտութեան եւ բժշկութեան մէջ շա՜տ-շատ յառաջացած է, սակայն եւ այնպէս յաճախ կը նկատենք, որ մարդ միշտ փնտռտուքի մէջ է, բանի մը կարիքը կը զգայ անընդհատ, եւ զայն գտնելու համար երբեմն հսկայ գումարներ կը ծախսէ եւ նոյնիսկ հազարաւոր մղոններ կը կտրէ:

Այսօրուան մարդուն ամենէն շատ փնտռածը դրամէն, հարստութենէն, գիտութենէն, ուսումէն, հաճոյքէն աւելի՝ ԼՌՈՒԹԻՒՆն է: Այսօրուան մարդը ամէն բանէ աւելի կարիք ունի լռութեան, լռութեան եւ լռութեան:

Կարգ մը եկեղեցական գրողներ իրենց գրութիւններուն ու քարոզներուն մէջ այդ լռութեան փնտռտուքը նմանցուցած են Աստուծոյ փնտռտուքին, որովհետեւ գաղտնիք չէ հոգեւոր կամ հաւատքի մարդուն համար, որ Աստուած լռութեան մէջ է, որ յաճախ կը յայտնուի ու կը խօսի մարդուն, նոյնիսկ լռութեամբ կը խօսի մարդուն հետ:

Մայր Թերեզան լռութեան այս փնտռտուքին մասին այսպէս կը գրէ. «Մենք կարիք ունինք զԱստուած գտնելու, բայց աղմուկի եւ խառնաշփոթի մէջ կարելի չէ գտնել զԻնք։ Աստուած լռութեան բարեկամն է։ Տեսէ՛ք, թէ ինչպէս բնութիւնը՝ ծառերը, ծաղիկները, խոտը, լռութեամբ կ՚աճին։ Տեսէ՛ք ինչպէս աստղերը, լուսինն ու արեւը լռութեան մէջ կը շարժուին։ Հոգիներ յուզելու համար մենք լռութեան կարիք ունինք»։ Մարդը, արդարեւ, կարիք ունի լռութեան, որպէսզի այդպիսով կարենայ Աստուծոյ բարեկամ դառնալ: 

Մայր Թերեզային տուած օրինակը բնութեան մասին այնքա՜ն խօսուն է նաեւ հոգեւոր կեանքով ապրողներուն համար, որոնք պէտք է իրենք զիրենք լռութեան վարժեցնեն, որպէսզի Աստուած աճեցնէ զիրենք եւ պէտք եղած ժամանակ օգտագործէ: Աւելին, մենք շատ յաճախ կը կարծենք, թէ խօսելով կամ շատ աղօթելով կրնանք մեր աղօթքներն ու խօսքերը լսելի դարձնել Աստուծոյ, բայց միթէ՞ այդպէս է: Երանաշնորհ Շնուտա Գ. Հայրապետը կը գրէ. «Միտքիս մէջ շատ խօսքեր կան, սիրտիս մէջ ալ շատ խօսքեր կան, սակայն կը նախընտրեմ լուռ մնալ, որպէսզի Աստուած խօսի»: Հետեւաբար, ո՛չ միայն լռութիւնը փնտռողներ ըլլանք, այլ՝ լուռ մնալ սիրողներ ըլլանք, որպէսզի Աստուած խօսի մեզի եւ մեր միջոցով: 

Պահեցողութեան այս շրջանը լաւագոյն առիթն է այդ բարձրութեան հասնելու:

ՎԱՐԱՆԴ ՔՈՐԹՄՈՍԵԱՆ

Վաղարշապատ