ԱՇԽՈՅԺ ԵՒ ԲԱԶՄԱՇԵՐՏ

Երեւան-Նիւ Տելհի առանցքին վրայ ստեղծուած աշխուժութիւնը կը շարունակուի բարձր մակարդակի այցելութիւններով։ Հայաստանի արտաքին գործոց նախարար Արարատ Միրզոյեան երէկ հիւրընկալուեցաւ Հնդկաստանի իր պաշտօնակցին՝ Սուպրահմանեամ Ճայշանքարի կողմէ։ Նախարարներու Նիւ Տելհիի ժամադրութեան զուգահեռ՝ երկու երկիրներուն միջեւ ստորագրուեցան շարք մը փաստաթուղթեր։ Նախարարները առաջին հերթին ունեցան առանձնազրոյց մը, որու աւարտին գլխաւորեցին պատուիրակութիւններու բանակցութիւնները։ Իրենց ներկայութեամբ ստորագրուեցան փաստաթուղթերը, մինչ անոնք յայտարարութիւններով ալ հանդէս եկան։

Նիւ Տելհիի մէջ Արարատ Միրզոյեան ելոյթ մըն ալ ունեցաւ Հնդկաստանի Համաշխարհային հարցերով խորհուրդին (ICWA) մէջ։ Այս առթիւ ան շեշտեց, որ երկու երկիրներու միջեւ ստեղծուած է բազմաշերտ ու հեռանկարային համագործակցութիւն մը, որ կը շարունակէ զարգանալ թափով, աշխուժօրէն։ Նոյն հաւաքոյթի ընթացքին Արարատ Միրզոյեան անդրադարձաւ նաեւ տարածաշրջանային հարցերու եւ անոնց վերաբերեալ Երեւանի մօտեցումներուն։ «Հակառակ բոլոր դժուարութիւններուն, անվտանգութեան սպառնալիքներուն՝ Հայաստան հետեւողականօրէն կ՚աշխատի Հարաւային Կովկասէ ներս կայուն խաղաղութեան հաստատման ուղղութեամբ», ըսաւ Միրզոյեան, որու խօսքով՝ խաղաղութիւնը այլընտրանք չունի ու միայն երկխօսութեան միջոցով համաձայնութիւնները կրնան ապահովել երկարատեւ կայունութիւն եւ տարածաշրջանային յառաջընթաց։

«Այսօր մենք կ՚ապրինք աշխարհի մը մէջ, որ հետզհետէ բարդ կը դառնայ։ Միջազգային հանրութիւնը կը բախի փոխկապակցուած մարտահրաւէրներու, երբ տարածաշրջանի մը մէջ տեղի ունեցած իրադարձութիւնները անմիջապէս ազդեցութիւն կ՚ունենան միւսներուն վրայ։ Հակամարտութիւնները, անվտանգութեան սպառնալիքները, մարդու իրաւունքներու եւ մարդասիրական տագնապներու լուրջ խախտումները, համաշխարհային անորոշութիւնները, կլիմայի փոփոխութիւնը, համաշխարհային մատակարարման շղթաներու խաթարումը եւ պարէնային անվտանգութեան տկարացումը նոր բարդութիւններ կը ստեղծեն միջազգային յարաբերութիւններուն մէջ», դիտել տուաւ Արարատ Միրզոյեան՝ շեշտելով, որ այդ բոլորի հետեւանքներուն անմիջականօրէն կ՚ենթարկուի նաեւ Հայաստան, որ կը դիմագրաւէ մարտահրաւէրներ։ Ան ցաւ յայտնեց, որ Հայաստան-Ատրպէյճան հաշտութեան որոնումներուն մէջ Պաքու չի փոխադարձեր Երեւանի շինիչ մօտեցումներուն։

«Հայաստան ներգրաւուած է նաեւ Թուրքիոյ հետ յարաբերութիւններու կարգաւորման գործընթացին։ Մենք վստահ ենք, թէ լիարժէք կարգաւորումը՝ յատկապէս այս պահուն դիւանագիտական յարաբերութիւններու հաստատումն ու սահմաններու բացումը, էապէս կը նպաստեն տարածաշրջանային խաղաղութեան ու կայունութեան։ Մենք կը շարունակենք այս երկխօսութիւնը եւ գործնական քայլերու ձեռնարկած ենք։ Նաեւ պայմանաւորուած ենք համատեղ վերականգնել Անիի կամուրջը, որ երկու երկիրներու ընդհանուր սահմանին նշանաւոր պատմական վայր մըն է։ Սա կը լրացնէ արդէն իսկ իրականացուած որոշումները, որոնք կը սահմանեն ուղիղ օդային թռիչքներ եւ կը վերցնեն օդային բեռնափոխադրումներու խոչընդոտները։ Մենք նաեւ պայմանաւորուած ենք բանալ սահմանը դիւանագիտական անցագրի տէրերու եւ երրորդ երկիրներու քաղաքացիներու համար։ Թէեւ այս համաձայնութիւնը տակաւին կեանքի չէ կոչուած։ Իրականացուելէ վերջ սա կը նպաստէ ո՛չ միայն Հայաստանին եւ Թուրքիոյ, այլեւ աւելի լայն տարածաշրջանին, որովհետեւ ապաշրջափակուելիք փոխադրութեան ուղիները կը ծառայեն՝ որպէս տարածաշրջանային խաղաղութեան եւ կայունութեան վճռորոշ գործօն», յայտնեց նախարարը։