ՃԻՏՏԷԻ ՄԷՋ ԲԱՆԱԿՑՈՒԹԻՒՆՆԵՐ

Միջազգային հանրային կարծիքի ուշադրութիւնը այսօր կեդրոնացած է Ճիտտէի վրայ, ուր Սէուտական Արաբիոյ տանտիրութեամբ՝ բանակցութիւններ տեղի կ՚ունենան Ամերիկայի Միացեալ Նահանգներու եւ Ուքրայնայի միջեւ։ Նախապէս Ռիատի մէջ ԱՄՆ-Ռուսաստան բանակցութիւններ տեղի ունեցած էին։ Ուքրայնայի հակամարտութեան վերջ տալու նպատակով քննարկումներ ծաւալուած էին Ուաշինկըթնի եւ Մոսկուայի միջեւ։ Այսօրուան բանակցութիւններն ալ նոյն օրակարգը ունին՝ այս անգամ Ուաշինկթըն-Քիեւ ձեւաչափին մէջ։

Բանակցութիւններու մասնակից պատուիրակութիւնները կը գլխաւորեն Ուքրայնայի նախագահ Վոլոտիմիր Զելենսքի եւ ԱՄՆ-ի պետական քարտուղար Մարքօ Ռուպիօ, որոնք առանձին հանդիպումներ ունեցան Սէուտական Արաբիոյ թագաժառանգին Մուհամմէտ պին Սելման իշխանին հետ։