ԽՈՉԸՆԴՈՏՆԵՐ

Ատրպէյճանի արտաքին գործոց նախարար Ճէյհուն Պայրամով հերթական անգամ անդրադարձաւ Հայաստանի հետ խաղաղութեան գործընթացի խոչընդոտներուն։ Աստանայի մէջ Ղազախիստանի փոխ-վարչապետ ու արտաքին գործոց նախարար Մուրատ Նուրթելուի հետ ճեպազրոյցի ընթացքին ան ըսաւ.

«Ատրպէյճանի եւ Հայաստանի միջեւ յարաբերութիւններու կարգաւորման եւ վերջնական խաղաղութեան համաձայնագրի ստորագրման ուղղութեամբ մեծ ճանապարհ կտրուած է, սակայն, կ՚ուզէի անգամ մը եւս նշել, որ Հայաստանի Սահմանադրութեան շրջանակներէն ներս առկայ են Ատրպէյճանի դէմ տարածքային պահանջներ։ Հայաստանի զինումը եւ ռէօվանշիզմի միտումը կը շարունակեն մնալ խաղաղութեան գործընթացի ամենամեծ խոչընդոտը»։

Պայրամով ընդունուեցաւ նաեւ Ղազախիստանի նախագահ Թոքայեւի կողմէ, որ յայտնեց, թէ եղբայրական Ատրպէյճանը յուսալի ռազմավարական դաշնակից կը համարուի իր երկրին համար։