ԹՈՒՐՔԻԱ-ՀԱՅԱՍՏԱՆ ՑԱՄԱՔԱՅԻՆ ՍԱՀՄԱՆԷՆ ՄԱՐԴԱՍԻՐԱԿԱՆ ՕԺԱՆԴԱԿՈՒԹԻՒՆ ՊԻՏԻ ՓՈԽԱԴՐՈՒԻ ԴԷՊԻ ՍՈՒՐԻԱ

Թուրքիա-Հայաստան սահմանի Մարգարա անցակէտը տասն օրով պիտի բացուի՝ դէպի Սուրիա մարդասիրական օժանդակութեան տեղափոխման նպատակով։ «Արմէնփրէս»ի հաղորդումով, Հայաստանի եւ Սուրիոյ կառավարութիւններուն միջեւ համաձայնութիւն գոյացած է՝ մարդասիրական օժանդակութեան առաքման հարցին շուրջ։

Երէկ, Երեւանի մէջ տեղի ունեցաւ Հայաստանի կառավարութեան հերթական նիստը, որու ընթացքին հրապարակուեցաւ Մարգարայի սահմանային անցակէտի վերաբերեալ որոշման հիմնաւորումը։ Այսպէս, Հայաստանի եւ Սուրիոյ համապատասխան մարմիններուն միջեւ աշխատանքային հանդիպումներ տեղի ունեցած են, քննարկուած են մարդասիրական աջակցութիւն ցուցաբերելու վերաբերեալ հարցեր։ Կառավարութեան այս որոշմամբ հնարաւորութիւն կը ստեղծուի, որպէսզի այդ փակ սահմանային անցակէտին միջոցաւ իրականացուին մարդասիրական բնոյթով բեռնափոխադրումները՝ Հայաստանէն դէպի Սուրիա, Թուրքիայէն տարանցումով։ 

Այս գործարքին համար նախատեսուած է տասնօրեայ ժամկէտ մը, այսինքն, Մարգարայի անցակէտը տասն օր գործնականօրէն բաց պիտի ըլլայ։

Ծանօթ է, որ վերջերս Թուրքիայէն Հայաստան մեկնած լրագրողներու խումբն ալ այցելած էր Մարգարայի անցակէտը։