ԱՆԵՐԵՐ ԶՕՐԱԿՑՈՒԹԻՒՆ

Մինչ Հայաստանեայց Առաքելական Եկեղեցին տագնապալի օրեր կ՚ապրի Հայաստանէ ներս ստեղծուած պետութիւն-եկեղեցի լարուածութեան հետեւանքով, շաբաթավերջին Պոլսոյ Պատրիարքական Աթոռն ալ արձագանգեց ստեղծուած իրավիճակին։ Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան աներեր եւ յստակ զօրակցութիւն յայտնեց Տ.Տ. Գարեգին Բ. Ամենայն Հայոց Վեհափառ Հայրապետին, որու դէմ մեղադրանքներ կը հասցէագրուին Հայաստանի վարչապետ Նիկոլ Փաշինեանի կողմէ։ Վեհափառ Հայրապետի թիրախաւորման եւ անոր դէմ շղթայազերծուած քարոզարշաւին կապակցութեամբ Ամեն. Ս. Պատրիարք Հայրը մանրամասնօրէն արտայայտեց իր դիրքորոշումը, ինչ որ շատ լայն արձագանգ գտաւ հայ աշխարհէ ներս։ Միեւնոյն ժամանակ, զանգուածային լրատուութեան միջոցներն ալ լայն տեղ տուին Նորին Ամենապատուութեան յայտարարութեան, որուն մէջ ընդհանուր առմամբ կան դրական յորդորներ եւ սպասումներ։ Այս փուլին ան խորհուրդ կու տայ համբերութեամբ սպասել Հայաստանի մէջ 2026 թուականին նախատեսուած ընտրութեան։ Միեւնոյն ժամանակ, Ամեն. Ս. Պատրիարք Հայրը շեշտած է, որ եթէ եկեղեցի-պետութիւն ընդհարման վիճակ մը ստեղծուի, ապա բոլորը պէտք է գիտակցին, որ մեր Առաքելական Սուրբ Եկեղեցւոյ շահերը եւ անկախութիւնը պիտի պաշտպանուին արտաքին բոլոր ճնշումներուն դէմ։

Ստորեւ նոյնութեամբ կը ներկայացնենք Ամեն. Ս. Պատրիարք Հօր յայտարարութիւնը, որ հրապարակուած է Պատրիարքական Աթոռի ընկերային ցանցերու պաշտօնական հաշիւներուն վրայ։

*

ՍԱՀԱԿ ՊԱՏՐԻԱՐՔԻ ԿԵՑՈՒԱԾՔԸ ՎԵՐՋԻՆ ԶԱՐԳԱՑՈՒՄՆԵՐՈՒ ԴԻՄԱՑ

Նորին Սուրբ Օծութիւն Տ. Տ. Գարեգին Բ. Ամենայն Հայոց Սրբազնագոյն եւ Վեհափառ Կաթողիկոսի անձին դէմ կատարուած ցնցիչ պնդումները՝ Հայաստանի Հանրապետութեան վսեմաշուք վարչապետ պարոն Նիկոլ Փաշինեանի կողմէ, համայն հայ աշխարհը խորապէս ալեկոծեց: Հայ աշխարհի մէջ բոլոր մակարդակներով շարունակուող բուռն վիճաբանութիւնները ահազանգային մակարդակով մտահոգութեանց պատճառ կը դառնան բոլոր անոնց համար, որոնք շահագրգռուած են հայկական խնդիրներով: Երբ կը ծաւալին վիճաբանութիւնները, կարգ մը շրջանակներ արդէն խօսելու սկսած են «նոր կաթողիկոս մը» ընտրելու մասին եւ իմ անունս ալ որպէս Կ.Պոլսոյ Պատրիարք հոլովուելու սկսած է կարգ մը անձերու կողմէ որպէս «նոր կաթողիկոսի» թեկնածու՝ արդէն որոշուած իշխանութիւններու կողմէ: Ուստի, պարտք կը զգամ պարզաբանելու հետեւեալ ճշմարտութիւնները՝ կանխարգիլելու համար աւելորդ խօսակցութիւնները:

Ա. Մեր հազարամեայ եկեղեցական աւանդութիւնները եւ մեր կղերականի կարգապահութիւնը մեզմէ կը պահանջեն, որ մինչ ներկայ կաթողիկոսը Աթոռի վրայ է, երբեք չձգտիլ, նոյնիսկ չմտածել նոր կաթողիկոս մը ընտրելու մասին: Ներկայիս մեր Ամենայն Հայոց Կաթողիկոսն է Նորին Սրբութիւն Գարեգին Բ. Վեհափառ Հայրապետը: Եկեղեցական դասու բոլոր անդամները եւ համայն հաւատացեալ ժողովուրդը պարտին իրենց ազգընտիր օծեալ Հայրապետին հնազանդիլ, հաւատարիմ մնալ, պաշտպանել ու անոր համար ընդմիշտ աղօթել մինչեւ որ Տէրը կ՚արտօնէ իրեն բազմիլ հայրապետական Աթոռին վրայ:

Բ. Այս օրերուն պարոն վարչապետի կողմէ սոյն խնդրի արծարծումը յստակ քաղաքական առընչութիւն ունի, յատկապէս ի տես առնելով 2026-ին կատարելիք քաղաքական ընտրութիւնները: Հարցը բոլոր քաղաքական շահերը գերազանցող բնոյթ ունի եւ այդպէ՛ս նրբօրէն պէտք է ձեռք առնուի եթէ ոչ, կը ստանայ եկեղեցի-պետութիւն ընդբախումի մը վիճակ, այդ պարագային մեր դիրքը յստակ թող լինի ամենուն. մեր Առաքելական Սուրբ Եկեղեցւոյ շահերը եւ անկախութիւնը կը պաշտպանենք բոլոր արտաքին ճնշումներու դէմ:

Գ. Մենք լուծումը կը տեսնենք համբերութեամբ 2026-ի ընտրութիւնները սպասելու մէջ: Արդէն Մայր Աթոռը 2026-ին Եկեղեցական ներկայացուցչական ժողով հրաւիրած է: Նոյնիսկ կարելի է, որ այդ վերածուի Ազգային եկեղեցական ժողովի: Անձնապէս գիտենք, որ Վեհափառ Հայրապետն ալ շատ յոգնած է այս վիճակէն: Սակայն եւ այնպէս, որքան որ ծանօթ ենք իր նկարագրին՝ ետ քայլ չի նետեր արտաքին քաղաքական ճնշումներու ներքեւ, ե՛ւ իրաւունք ունի:

Մեր հայրական յորդորն է բոլոր անոնց, որոնք հարազատօրէն կը մտածեն Առաքելական մեր եկեղեցւոյ բարօրութիւնը եւ Հայաստանի անդորրութիւնը։ Պահ մը ետ քաշուիլ եւ Տիրոջ առջեւ կենալ, խաչակնքել եւ Քրիստոսի իշխանութեան յանձնել իրավիճակը աղօթքով եւ ապաշխարութեամբ: Եկէ՛ք, հրաժարինք իրարու որսորդը դառնալէ եւ իրարու հանդէպ ցոյց տանք այն ողորմութիւնը, զոր Տէրը մեզի ցոյց կու տայ: 

«Ցուցու՜ր մեզի ո՛վ Տէր, քու ողորմութիւնդ եւ քու փրկութիւնդ մեզի տուր: Ողորմութիւնը ու ճշմարտութիւնը իրարու հանդիպեցան, արդարութիւնը եւ խաղաղութիւնը իրար համբուրեցին: Տէրը բարութիւն պիտի տայ այն ատեն ու մեր երկիրը՝ իր պտուղը» (Սաղմոս 85:7,10,12)։

Խաղաղութիւն ամենեցուն

ՍԱՀԱԿ Բ.
ՊԱՏՐԻԱՐՔ ՀԱՅՈՑ ԹՈՒՐՔԻՈՅ