Արխիւ

Տեսալսողական միջոցներէ եւ մամլոյ հրատարակութիւններէ տեղեկացանք, թէ Գերշ. Տ. Արամ Արքեպիսկոպոս Աթէշեան 21 Դեկտեմբեր 2017-ին Հայաստանի մէջ մամլոյ ասուլիս մը կազմակերպելով արտայայտուած է Թուրքիոյ Հայոց 85-րդ Պատրիարքի ընտրութեան առընչութեամբ։ Այսպէսով յայտնի դարձած է, որ ճշմարտութիւնները խեղաթիւրելու, գործընթացին հետ մօտէն չշահագրգռուող անձերը խաբելու միտող իր նախաձեռնութիւնները, որոնց յաճախ ականատես կ՚ըլլանք Թուրքիոյ մէջ, կը շարունակուին անցելով երկրի սահմանները։

Մխիթարեան վարժարանի երգչախումբը կաթողիկէ աշխարհի Ս. Ծննդեան տօնին առթիւ համերգով մը հանդէս եկաւ Աւստրիական մշակոյթի կեդրոնին նախաձեռնութեամբ։

Վաքըֆներու խորհուրդի մօտ փոքրամասնութեանց ներկայացուցիչ Թորոս Ալճան նախընթաց օր Ս. Ծննդեան տօնին առթիւ այցելեց Ֆէնէրի յունաց պատրիարքարանը:

Ս. Ստեփանոս Նախասարկաւագի յիշատակի տօնին առթիւ նախընթաց օր Ս. Աստուածածին Աթոռանիստ Մայր եկեղեցւոյ մէջ տեղի ունեցան արարողութիւններ, որոնց նախագահեց Պատրիարքական տեղապահ Տ. Գարեգին Արք. Պեքճեան։

Ամանորի կէս գիշերին Մայր Աթոռ Սուրբ Էջմիածնի մէջ տեղի պիտի ունենան աւանդական արարողութիւններ։ Այսպէս, Ամենայն Հայոց Տ.Տ. Գարեգին Բ. Կաթողիկոսի օրհնութեամբ, 31 Դեկտեմբերին, ժամը 24.00-ին, Սուրբ Էջմիածնի Մայր Տաճարին եւ Հայաստանի բոլոր եկեղեցիներուն մէջ պիտի կատարուի գոհաբանական մաղթանք, որուն պիտի յաջորդէ Նռնօրհնէքի արարողութիւն։

ԱԼԵՔՍ ՍՐԿ.ԳԱԼԱՅՃԵԱՆ 

«Հաւատքը անտեսանելի է երբ ան մարդ արարածիս հոգւոյն մէջ պարփակուած է, նման լեռներու կողերուն մէջ խրած ու թաղուած ջրաւազաններուն, որոնց ուղխքը միայն կը տեսնես հոսուն ու կարկաջուն աղբիւրներուն մէջ»

ՄԱՇ­ՏՈՑ ՔԱ­ՀԱ­ՆԱՅ ԳԱԼ­ՓԱՔ­ՃԵԱՆ

Կեանքը ունի ելեւէջներ, եւ անշուշտ զառիթափներ՝ որոնց կ՚ենթարկուի ամէն մարդ, երկար կամ կարճ ժամանակ, երբեմն ամբողջ կեանքի տեւողութեան, երբեմն ալ՝ շուտ մը մոռցուելու չափ ժամանակաւոր եւ աննշան։ Կեանքի մէջ կան բազմաթիւ իրողութիւններ՝ դէպքեր եւ երեւոյթներ, զոր օրինակ՝ զուարճութիւն, հաճոյք՝ երբեմն չափազանցուած կերպով, երբեմն ալ անվնաս նկատուած բնական եւ արուեստական ձեւերով։

Վանաձորի կերպարուեստի թանգարանը աշխոյժ գործունէութիւն կը ծաւալէ ինչպէս գիտական-ցուցադրական, այնպէս ալ կրթական ոլորտէն ներս։ «Արմէնփրէս»ի հաղորդմամբ, Վանաձորի կերպարուեստի թանգարանի տնօրէն Փափակ Ալոյեանի խօսքով՝ իր տնօրէնութեան տասնհինգ տարիներուն ընթացքին 145 ստեղծագործութիւն նուիրաբերուած է թանգարանին:

Վարչապետ Պինալի Եըլտըրըմ վաղը պիտի այցելէ Սէուտական Արաբիա։ ՄԱԿ-ի ընդհանուր ժողովէն ներս Երուսաղէմի ճգնաժամին վերաբերեալ տեղի ունեցած քուէարկութեան կը յաջորդէ այս այցելութիւնը, որուն քաղաքական մեկնաբանները կը վերագրեն նուրբ նշանակութիւն։