Արխիւ

ԱՐԱՄ ԱԲՐԱՀԱՄԵԱՆ

«Ժողովուրդը» հրճուած է ընտրութիւններու մէջ տարած իր «փայլուն յաղթանակով»՝ իրեն յաջողած է «չոքըցնել», «կզըցնել» եւ նման այլ բազմաթիւ գործողութիւններ ընել Փաշինեանի բոլոր «չուզողներուն» դէմ, ներառեալ՝ նզովեալ մտաւորականները։ «Ժողովուրդը» կրնայ ուրախանալ, թմբուկ զարնել, վարչապետին տալ «պողպատէ լիազօրութիւնը», «արդարադատութեան սուրը», որպէսզի ան իրականացնէ հաշուեյարդար, վրիժառութիւն եւ այլն։

Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան շնորհաւորական մը ուղարկեց Հայաստանի վարչապետ Նիկոլ Փաշինեանին, որու գլխաւորած «Քաղաքացիական պայմանագիր» կուսակցութիւնը յառաջատար դիրքի վրայ դուրս եկաւ վերջին արտահերթ խորհրդարանական ընտրութենէն։

Գոհունակութեամբ վերահասու կ՚ըլլանք, թէ մեր համայնքի նոր սերունդէն Լուսին Ենիեորկան ծափահարելի ընթացք մը ունի նկարչութեան մէջ։ Լուսին Ենիեորկան, որ կը յաճախէ «Փիէռ Լոթի» ֆրանսական վարժարանը, փոքր տարիքէ ի վեր հետամուտ է նկարչութեան եւ հետեւողական յաջողութիւններ կ՚արձանագրէ այս մարզէն ներս։

ՆԱՐԷ ԳԱԼԵՄՔԷՐԵԱՆ

Այնպէս կը թուի, որ հեռակայ, առցանց աշխատանքը, գոնէ մասամբ, այլեւս մնայուն բնոյթ պիտի ստանայ, բայց աշխարհի ամենէն մեծ ընկերութիւններու սեփականատէրեր, տնօրէններ եւ պատասխանատուներ հետզհետէ աւելի ու աւելի կը խօսին պաշտօնեաները գրասենեակներ վերադարձնելու անհրաժեշտութեան մասին:

ՍԱԳՕ ԱՐԵԱՆ

Մինչ Լիբանանի վարժարանները ոչ գրկաբաց ձեւով կը դիմաւորեն ամառնային արձակուրդի օրերը, անդին հազարումէկ խնդիրներ կը շարունակեն մնալ անլոյծ ու ասոնց կողքին ալ մեծ հարցադրումներու «ամպրոպ»ը՝ հակառակ ամրան տապին՝ կը շարունակէ կուտակուիլ ծննդավայրիս երկնակամարին վրայ։

Հայաստանի առաջին նախագահ Լեւոն Տէր-Պետրոսեանի կողմէ գլխաւորուած «Հայ ազգային քոնկրէս» կուսակցութիւնը երէկ յայտարարութիւնով մը հանդէս եկաւ երկրի վերջին արտահերթ խորհրդարանական ընտրութեան մասին։ Այս առթիւ շեշտուեցաւ, որ վերջին արտահերթ ընտրութիւնները հեռու էին ազատ եւ արդար ըլլալէ, նաեւ որակապէս լուրջ նահանջ էին 2018 թուականի ընտրութիւններուն բաղդատմամբ։

Լիզպոնի «Գալուստ Կիւլպէնկեան» հիմնարկի Հայկական համայնքներու բաժանմունքը կը շարունակէ սփիւռքահայ կրթօճախներու աջակցութեան ուղղեալ ծրագրերը՝ մասնաւորապէս Լիբանանի հայկական վարժարաններու ցանցին միջոցաւ։ Այսպէս, հիմնարկը ներկայիս նոր նախաձեռնութիւնով մը հանդէս կու գայ ու կը պատրաստուի կեանքի կոչել Լիբանանի մէջ ուսուցչական վերաորակաւորման նոր ծրագիր մը:

Հայաստանի վարչապետ Նիկոլ Փաշինեան երէկ հիւրընկալեց ռուսահայ յայտնի գործարար ու բարերար Սամուէլ Կարապետեանը, որ «Տաշիր» ընկերութիւններու խումբի ղեկավարն է։ Պաշտօնական աղբիւրներու հաղորդումներով, հանդիպման ժամանակ անդրադարձ կատարուեցաւ «Տաշիր»ի ներդրումային ծրագրերու ընթացքին։

Երէկ, Երեւանի մէջ տեղի ունեցաւ բողոքի ցոյց մը՝ շաբաթավերջի արտահերթ ընտրութեան արդիւնքով խորհրդարան մուտք գործած «Հայաստան» դաշինքին կողմէ։ Հանրապետութեան Աւագ դատախազութեան շէնքին առջեւ տեղի ունեցաւ այս հակազդեցութեան հաւաքը, որուն պատճառ դարձած էր բժիշկ Արմէն Չարչեանի կալանաւորումը։