ՎԵՀ. ՀԱՅՐԱՊԵՏԻ ՊԱՏԳԱՄԸ

Սեպտեմբերի 1-ը ամէն տարի Հայաստանի մէջ կը նշուի՝ որպէս Գիտելիքի, գրի եւ դպրութեան օր։ Ամենայն Հայոց Տ.Տ. Գարեգին Բ. Կաթողիկոսը այս առթիւ հրապարակեց պատգամ մը, որ կը համընկնի նաեւ 2020-2021 վերամուտին։ Ստորեւ կը ներկայացնենք Վեհափառ Հայրապետի պատգամը։

*

Մայր Աթոռ Սուրբ Էջմիածնէն Հայրապետական օրհնութեամբ Մեր շնորհաւորանքները կը բերենք ուսանող եւ աշակերտ մեր զաւակներուն եւ կրթական գործի բոլոր նուիրեալներուն՝ Գիտելիքի, գրի եւ դպրութեան օրուայ առթիւ։

Դարէ դար մեր ժողովուրդը սիրոյ եւ մեծարումի զգացումով ապրած է գիտելիքի ու դպրութեան հանդէպ, պահպանած է զայն հակառակ ամէն փորձութեան եւ աւանդած մեզի՝ իբրեւ ազգային ժառանգութիւն, զոր դարձած է մեր յարատեւութեան գրաւականներէն մին։

Աշխարհի վրայ այսօր տարածուած համավարակի հետեւանքով բազում մարտահրաւէրներ յառաջ եկած են, դժուարութիւններ յառնած են նաեւ մեր կրթական հաստատութեանց առջեւ ուսումնական գործընթացի մէջ։ Մենք աղօթք կը վերառաքենք առ Բարձրեալը, որպէսզի անխոչընդոտ սկսի ուսումնական տարին եւ մեր զաւակները տոգորէ նոր յոյսերով, ուսումնատենչ ոգիով եւ աննկուն ջանասիրութեամբ, որպէսզի գիտելիքն ու իմացութիւնը, հոգեւոր եւ բարոյական արժէքները շարունակաբար առանցքային եւ հիմնարար ըլլան մեր ժողովուրդի կեանքին մէջ։

Կ՚աղօթենք, որ Տէրը բազում յաջողութիւններով պսակէ մեր սաներու ուսումնառութեան ընթացքը ու զօրակից ըլլայ մեր մանկավարժներուն եւ կրթական գործի բոլոր մշակներուն՝ իրենց նուիրական եւ պատասխանատու կոչման եւ առաքելութեան մէջ։

Թող մեր Տիրոջ՝ Յիսուս Քրիստոսի աստուածային սէրն ու Ս. Հոգւոյ առատ շնորհները միշտ մեր ժողովուրդի հետ ըլլան. ամէն։

                                                                                  Օրհնութեամբ՝

                                                                                                                                                               ԳԱՐԵԳԻՆ Բ.
                                                                         ԿԱԹՈՂԻԿՈՍ ԱՄԵՆԱՅՆ ՀԱՅՈՑ