ՊԻՒՅԻՒՔՏԷՐԷԻ ԵԿԵՂԵՑՒՈՅ ՄԷՋ ՍՈՒՐԲ ՊԱՏԱՐԱԳ

Երէկ, Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան Պիւյիւքտէրէի Ս. Հռիփսիմեանց եկեղեցւոյ մէջ նախագահեց՝ պաշտամունքի վերաբացման յաջորդած անդրանիկ Ս. Պատարագին, որու ընթացքին տուաւ օրուան պատգամը։ Պատարագիչն էր Տ. Յովակիմ Վրդ. Սերովբեան։ Ներկայ էին նաեւ Տ. Զաքէոս Ծայրագոյն Վարդապետ Օհանեան եւ եկեղեցւոյ հոգեւոր հովիւ Տ. Թէոդիկ Քհնյ. Չեթինքայա։ Երգեցողութիւնները կատարուեցան Կէտիկփաշայի եկեղեցւոյ Զուաթնոց դպրաց դաս-երգչախումբին կողմէ՝ ղեկավարութեամբ Ատրուշան Սրկ. Հալաճեանի եւ երգեհոնահարութեամբ Արտէն Զէյֆիեանի։ Ս. Պատարագի աւարտին կատարուեցաւ հոգեհանգստեան պաշտօն, որու ընթացքին ոգեկոչուեցան եկեղեցւոյ հանգուցեալ բարերարներն ու ընտանիքները։

Կրօնական արարողութիւններէն վերջ յարակից սրահին մէջ սարքուեցաւ սիրոյ սեղան։ Ատենապետ Մինաս Մեծատուրի կողմէ գլխաւորուած թաղային խորհուրդը ջերմ մթնոլորտի մը մէջ հիւրընկալեց բոլոր ներկանները։ Համայնքային շրջանակներէն բազմաթիւ ծանօթ դէմքեր համախմբուեցան Պիւյիւքտէրէի եկեղեցւոյ մէջ, ուր ստեղծուած բարձր տրամադրութեան պայմաններուն ներքեւ բոլորի գնահատանքին առարկայ դարձաւ թաղային խորհուրդը, որ կեանքի կոչեց Վոսփորի Եւրոպական ափի այս սրբավայրի վերանորոգման ծրագիրը։