ԵԿԵՂԵՑՒՈՅ ՀԵՏ ԿԱՊԵՐՈՒ ՀԱՄԱՐ ԽՈՒՄԲ

Հայաստանի կառավարութեան եւ Հայաստանեայց Առաքելական Եկեղեցւոյ յարաբերութիւններուն վերաբերեալ հարցերու համար ստեղծուեցաւ աշխատանքային խումբ մը՝ վարչապետ Նիկոլ Փաշինեանի հրամանագրով։ «Արմէնփրէս»ի հաղորդումներով, կառավարութեան պաշտօնական աղբիւրները երէկ տեղեկացուցին, որ նորաստեղծ աշխատանքային խումբի անդամներն ալ արդէն յայտնի են։ Հայաստանի կառավարութեան կառուցուածքի եւ գործունէութեան մասին օրէնքի տրամադրութիւններու հիման վրայ ստեղծուած է այս աշխատանքային խումբը, որուն մաս կը կազմեն հետեւեալ անունները.

Եդուարդ Աղաճանեան (վարչապետի աշխատակազմի ղեկավար), Արթուր Յովհաննիսեան (արդարադատութեան նախարարի առաջին տեղակալ), Վաչէ Տէրտէրեան (տարածքային կառավարման եւ զարգացման նախարարի առաջին տեղակալ), Շաւարշ Քոչարեան (արտաքին գործոց փոխ-նախարար), Արեւիկ Անափիոսեան (կրթութեան ու գիտութեան փոխ-նախարար), Տիգրան Գալստեան (մշակոյթի փոխ-նախարար), Գաբրիէլ Բալայեան (պաշտպանութեան փոխ-նախարար), Աւագ Աւանէսեան (տնտեսական զարգացման եւ ներդրումներու փոխ-նախարար), Արման Պօղոսեան (ելմտական փոխ-նախարար), Վարդան Մովսիսեան (փոխ-ոստիկանապետ), Արման Պետրոսեան (կալուածներու արձանագրման կոմիտէի ղեկավարի տեղակալ), Արթուր Մանուկեան (պետական եկամուտներու կոմիտէի փոխ-նախագահ), Սարգիս Թորոսեան (վարչապետի աշխատակազմի ընկերային հարցերու վարչութեան պետ)։

Բաց աստի, Հայաստանեայց Առաքելական Եկեղեցւոյ կողմէ սոյն աշխատանքային խումբի կազմին մէջ ընդգրկուած են՝ Տ. Արշակ Եպսկ. Խաչատրեան (Մայր Աթոռ Սուրբ Էջմիածնի դիւանապետ), Տ. Մուշեղ Եպսկ. Պապայեան (Մայր Աթոռ Սուրբ Էջմիածնի վարչատնտեսական բաժնի տնօրէն), Գէորգ Դանիէլեան (Գերագոյն հոգեւոր խորհուրդի անդամ), Ա. Զօհրապեան (Մայր Աթոռ Սուրբ Էջմիածնի իրաւախորհրդատուական խումբի անդամ) եւ Ա. Յովհաննիսեան (Մայր Աթոռ Սուրբ Էջմիածնի ելմտական բաժնի տեսուչ)։