ՎԵՀԱՓԱՌ ՀԱՅՐԱՊԵՏԸ ՇՆՈՐՀԱՒՈՐԵՑ ՄԱՅՐ ԱԹՈՌ ՍՈՒՐԲ ԷՋՄԻԱԾՆԻ ՊԱՇՏՕՆԷՈՒԹԻՒՆԸ

Տ.Տ. Գարեգին Բ. Ամենայն Հայոց Կաթողիկոսը երէկ Մայր Աթոռ Սուրբ Էջմիածնի զանազան կառոյցներէ ներս պաշտօնավարող աշխարհական աշխատակիցներու հետ համախմբուեցաւ՝ Ամանորի եւ Ս. Ծնունդի տօներուն առթիւ։ Վեհափառ Հայրապետի կողքին էին Մայր Աթոռ Սուրբ Էջմիածնի Վարչատնտեսական բաժնի տնօրէն Տ. Մուշեղ Եպսկ. Պապայեան եւ լուսարարապետի պաշտօնակատար Տ. Յարութիւն Վրդ Կիրակոսեան։ Տ. Մուշեղ Եպսկ. Պապայեանի եւ վարչատնտեսական բաժնի փոխ-տնօրէն Արմէն Ղազարեանի կողմէ արտասանուած ողջոյնի խօսքերէն վերջ, Նորին Սրբութիւնը ներկաներուն ուղղեց իր պատգամը։ Ան բոլորին ջերմ շնորհաւորութիւններ յղեց եւ բարձրօրէն գնահատեց Մայր Աթոռի պաշտօնէութեան նախանձախնդիր ծառայութիւնն ու նուիրումը՝ ի խնդիր Սուրբ Էջմիածնի առաքելութեան առաւել արդիւնաւորման ու զօրացման։ Նորին Սրբութիւնը Մայր Աթոռի աշխատակիցներուն յորդորեց զօրեղ կամքով, յոյսով եւ հաւատքով դիմակայել առկայ բոլոր փորձութիւններուն ու դժուարութիւններուն՝ վստահութիւն յայտնելով նաեւ, թէ մեր ժողովուրդի զաւակները Աստուծոյ ապաւինութեամբ կարող կ՚ըլլան յաղթահարել հայրենիքի առջեւ ծառացած մարտահրաւէրները։ Ան շեշտեց, որ եկեղեցին հովուական, հոգեւոր-խնամատարական եւ ընկերային գործունէութեամբ իր կարելի ջանքերը կը ներդնէ՝ ի նպաստ հայ ժողովուրդին բաժին հասած դժուարութիւններու յաղթահարման։

Հուսկ, Վեհափառ Հայրապետը Մայր Աթոռի աշխատակիցներուն մաղթեց Աստուծոյ օգնականութիւնն ու պահպանութիւնը՝ հայցելով երկնաւորի օրհնութիւնն ու շնորհները անոնց ընտանիքներուն, որպէսզի ուրախութեան զգացումով կարողանան ամբողջանուէր ծառայութիւն բերել Սուրբ Եկեղեցւոյ եւ հայրենիքին։