ՄԻՋՎԱՐԺԱՐԱՆԱՅԻՆ ՖՈՒԹՊՈԼԻ ՄՐՑԱՇԱՐՔԸ ՓԱՅԼՈՒՆ ԱՆՑԱՒ

Ֆէրիգիւղի Մէրամէթճեան վարժարանի տնօրէնութեան նախաձեռնութեամբ այս տարի եւս կազմակերպուեցաւ՝ ողբացեալ Նուպար Համամճեանի յիշատակին ձօնուած ֆութպոլի մրցաշարքը, որ վերածուած է գեղեցիկ աւանդութեան մը։ Միջվարժարանային այս մրցաշարքը ֆութպոլի գեղեցիկ մրցակցութեան մը թատերաբեմը հանդիսացաւ եւ առիթ դարձաւ, որպէսզի մեր վարժարաններու սաները ցոյց տան մարմնամարզի իրենց հմտութիւնները։

Մրցաշարքի արդիւնքին ախոյեանի կոչումը նուաճեց Եշիլգիւղի վարժարանին խումբը, որուն յաջորդեցին Մխիթարեանի, Գարակէօզեանի եւ Թարգմանչացի խումբերը։

Ֆէրիգիւղի ընտանիքի վարիչները մրցաշարքէն վերջ ջերմօրէն շնորհաւորեցին բոլոր դափնեկիրները, մասնակիցները եւ պատասխանատու ուսուցիչները։