ՊԻՏԻ ԴԱՒԱՃԱՆԵ՛Մ ՀԱՅՐԵՆԻՔԻՍ (ԶԱՌԱՆՑԱՆՔ ԱԶԱՏՈՒԹԵԱՆ ԵՒ ՎԱԽԻ ՄԱՍԻՆ)

ՄԻՋԻՆ ԱՐԵՒԵԼՔԻ ԲԱՐՁՐԱԿԱՐԳ ՎԱՃԱՌԱՏԵՂԻՆ

Ուսանող մը. Նազէք ալ-Մալաիքէին1 «Քարարադ ալ-մաուճա - ալիքի լուծումները» հատորը ունի՞ք:

Վաճառողը. ունիմ՝ «ինչպէ՛ս ալիքը թիավարել» հատորը:

Ուսանողը. ո՞վ է հեղինակը:

Վաճառողը. արաբ ամենէն նշանաւոր գրողներէն ու բանաստեղծներէն մէկը:

***

Բանուոր. հաց կա՞յ:

Վաճառողը. մարդ միայն հացով չ՚ապրիր:

***

Զարգացած մը. հետեւաբար, մէկ քիլօ ազատութիւն տուր մեզի:

Վաճառողը. ներմուեծելու եւ արտածելու ազատութենէն բացի, ուրիշ ազատութիւն չունիմ:

Զարգացածը. իսկ արտայայտուելու ազատութի՞ւն:

Վաճառողը. ծիրանով:

***

Կաթնատու մը. տակդիրներ ունի՞ս, որ կտորէն երկու անգամ աւելի չոր ըլլան:

Վաճառողը. մեծ քանակութեամբ ունէի, բայց սպառեցան: Այս օրերուն մեծ պահանջարկ ունին տակդիրները:

Կաթնատուն. տարօրինակ. ո՛չ մէկ խանութի մէջ կայ, տեսնես ի՞նչ է պատճառը:

Վաճառողը. որովհետեւ մեծերը սկսած են պատրաստուիլ շուտով տակդիրներ օգտագործելու:

Կաթնատուն. ինչո՞ւ:

Վաճառողը. արաբական յաջորդ հանգրուանը այդպէս կը պահանջէ:

***

Դեռահաս մը. Նաճլա Ֆաթհիին նկարը ունի՞ս Փարիզի մէջ:

Վաճառողը. ո՛չ. Պիկընի նկարը ունիմ Եգիպտոսի մէջ, իսկ Շարոնինը՝ Սայտայի մէջ:

Դեռահասը. լողազգեստո՞վ:

Վաճառողը. ո՛չ, պիքինիով:

***

Արտագաղթող մը. «Լիբանան, ո՜վ դուն կանաչ սիրուն» երգի ժապաւէնը ունի՞ս:

Վաճառողը. ո՛չ:

Արտագաղթողը. «Կանա՜չ ես, հայերնիքս, կանա՜չ» երգի՞նը:

Վաճառողը. ո՛չ:

Մարտիկ մը. «Համրայի պալատը՝ արաբներուն պարծանքը» գիրքը ունի՞ս:

Վաճառողը. ո՛չ:

Մարտիկը. իսկ «Կարմիր անկախութիւնը դուռ ունի» բանաստեղծութի՞ւնը:

Վաճառողը. ո՛չ, ո՛չ, առաջին բառէն հասկցէ՛ք, այլեւս ո՛չ կանաչ եւ ո՛չ ալ կարմիր բան մնաց, բացի ճանապարհային լուսացոյցներէն:

***

Պատմաբան մը. մօտիկի համար ակնոցներ ունի՞ս:

Վաճառողը. ո՛չ:

Պատմաբանը. իսկ՝ հեռուի:

Վաճառողը. ո՛չ:

Պատմաբանը. ինչ կերպով ալ ըլլայ, անպայմանօրէն պէտք է մէկ հատ մը ապահովեմ:

Վաճառողը. ինչո՞ւ. Պաղեստինը պիտի չտեսնես, գիւղդ պիտի չտեսնես, ազատութիւնը պիտի չտեսնես, գարունը պիտի չտեսնես, ապագան պիտի չտեսնես: Ինչո՞ւ համար յուսահատ քիթդ յոգնեցնես՝ զայն շալկելու համար:

***

Ամուսնալուծուած մը. Ֆաթէն Համամէի «լուծում մը կ՚ուզեմ» ֆիլմը, ունի՞ս:

Վաճառողը. բոլոր լուծումները Ամերիկայի ձեռքն են:

***

Հայթայթիչ (contractor) մը. շերտակ (plywood) եւ ոլորուած երկաթ (twisted iron) ունի՞ս:

Վաճառողը. ո՛չ, հակառակ հանգամանքներ եւ ոլորուած ժողովուրդ մը ունիմ:

ՎԱՐԱՆԴ ՔՈՐԹՄՈՍԵԱՆ

•շար. 30

Վաղարշապատ

1 Իրաքցի բանաստեղծուհի: Ծնած է 23 օգոստոս 1923-ին: Նախնական կրթութիւնը Իրաքի մէջ ստացած է, իսկ բարձրագոյնը՝ Ամերիկա: 1990-էն սկսեալ Գահիրէի մէջ ապրած է, մինչեւ իր մահը՝ 20 յունիս 2007 թուականը: Շատերու համար, Նազէքը առաջին ազատ բանաստեղծութիւն գրողը եղած է արաբներուն մէջ, 1947-ին: Հեղինակ է շուրջ մէկ տասնեակ բանաստեղծական հատորներու:

Չորեքշաբթի, Յուլիս 31, 2024