Փեքինի մէջ երէկ սկսան 24-րդ Ձմրան ողիմպիականները։ Առաջին անգամ այս խաղերուն ժամանակ արհեստական ձիւնածածկոյթ կ՚օգտագործուի։ Նկատի ունենալով արեւմտեան երկիրներու եւ Չինաստանի միջեւ առկայ ընդհանուր լարուածութիւնը՝ այս մրցաշարքի ժամանակ կարելի չէ եղած հարիւր տոկոս ստեղծել ակնկալւած մթնոլորտը։
Հայաստանի Սահմանադրութեան բարեփոխումներու խորհուրդը երէկ ժողով մը գումարեց Երեւանի մէջ:
Արդարադատութեան նախարար Կարէն Անդրէասեան մեծապէս կարեւորեց գործընթացի թափանցիկ ձեւով յառաջ տարուիլը:
Հայաստանի Մարդու իրաւանց պաշտպան Արման Թաթոյեան հրապարակեց հերթական զեկոյցը, որ կը ցոլացնէ, թէ 44-օրեայ պատերազմէն յետոյ ինչ վիճակի մէջ է Ատրպէյճանի հայատեացութեան ու թշնամանքի քաղաքականութիւնը։ Անգլերէնով պատրաստուած զեկոյց մըն է այս մէկը, որ ընկերային ցանցերու վրայ հրապարակուած է Արման Թաթոյեանի կողմէ։
Հայաստանի վարչապետ Նիկոլ Փաշինեան երէկ հիւրընկալեց հայկական երաժշտական աշխարհի արդի հսկաներէն մաէսթրօ Լորիս Ճգնաւորեանը։ Երգահան ու խմբավար Լորիս Ճգնաւորեանի հետ զրուցելու ժամանակ Փաշինեան անգնահատելի համարեց անոր ներդրած աւանդը երաժշտական արուեստին մէջ։
Ռուսաստան եւ Չինաստան երէկ տեղեկացուցին, որ դէմ են ՆԱԹՕ-ի ապագայ ընդլայնման եւ դաշինքին կոչ ուղղեցին, որպէսզի հրաժարի պաղ պատերազմի մօտեցումներէն։ Մոսկուա եւ Փեքին ներկայիս կը նախատեսեն աշխուժացնել իրենց համագործակցութիւնը Եւրոասիոյ տնտեսական միութեան եւ «Մէկ գօտի, մէկ ճանապարհ» նախաձեռնութեան շրջանակներէն ներս։
Ուաշինկթընի մէջ վերջին օրերուն տեղի ունեցաւ Թուրքիոյ, Ատրպէյճանի, Էօզպեքիստանի, Ղազախիստանի եւ Իսրայէլի դեսպաններուն հանդիպումը։ Այս հաւաքոյթի հիւրընկալն էր Ատրպէյճանի դեսպան Խազար Իպրահիմ, որ ընդունեց նաեւ Ուաշինկթընի մօտ Թուրքիոյ դեսպան Մուրատ Մերճանը։
«Fly One Armenia»ի վարչական խորհուրդի տնօրէնին կողմէ գլխաւորուած պատուիրակութիւնը երէկ առաւօտ Պատրիարքարան այցելելէ վերջ Սուրբ Փրկիչ Ազգային հիւանդանոցէն ներս ջերմ մթնոլորտի մը մէջ հիւրընկալուեցաւ հոգաբարձութեան ատենապետ Պետրոս Շիրինօղլուի կողմէ, իսկ յետմիջօրէին մամլոյ ասուլիս մը տեղի ունեցաւ ՍԾՏՀԿ-ի մօտ Հայաստանի մշտական ներկայացուցչութեան երդիքին տակ: Օրուայ աւարտին Ճիհանկիրի «Ճաշ» նշանաւոր ճաշարանի սեփականատէր Տայք Միրիճանեան ընթրիքի սեղանով մը պատուեց հիւրերը, որոնք հրաժեշտ կ՚առնեն այսօր երեկոյեան ժամերուն նախատեսուած վերադարձի թռիչքով:
Արամ Անանեան. «Մեր փիլիսոփայութիւնն է անվտանգ ծառայութիւնը հասանելի դարձնել բոլորին։ Մեր ընկերութիւնը կը ձգտի որակեալ ու յաւակնոտներու շարքին դասուիլ եւ իր կարողութիւններով ըլլալ պահանջուած, զարգացնել ենթակառուցուածքները, պայմանաւորել հայկական օդագնացութեան ապագան՝ ընդհուպ մինչեւ լաւ ազգային փոխադրող մը դառնալը»:
Թուրքիա-Հայաստան յարաբերութիւններու բնականոնացման գործընթացը կը շարունակուի՝ մինչ երկու երկիրներու Արտաքին գործոց նախարարութիւնները երէկ պաշտօնապէս հրապարակեցին յատուկ ներկայացուցիչներու՝ Սերտար Քըլըչի եւ Ռուբէն Ռուբինեանի երկրորդ հանդիպման վերջնական մանրամասնութիւնները։
Հանրապետութեան նախագահ Ռեճեփ Թայյիպ Էրտողան երէկ այցելեց Քիեւ, ուր հիւրընկալուեցաւ Ուքրայնայի նախագահ Վլատիմիր Զելենսքիի կողմէ։ Էրտողանի այցը զուգադիպեցաւ այնպիսի ժամանակաշրջանի մը, երբ Ուքրայնայի տագնապին ընթացքը կը բնորոշէ միջազգային օրակարգը եւ համաշխարհային յառաջատար դերակատարները սաստիկ ճնշում կը բանեցնեն Ռուսաստանի վրայ։
Ամերիկայի Միացեալ Նահանգներու նախագահ Ճօ Պայտըն երէկ տեղեկացուց, որ իր երկիրը Սուրիոյ հիւսիսի Իտլիպ քաղաքին մէջ կազմակերպած է յատուկ գործողութիւն մը, որու ընթացքին «Իրաք-Շամի իսլամական պետութիւն» (ԻՇԻՊ) ահաբեկչական խմբաւորման պարագլուխ Էպու Իպրահիմ էլ Հաշիմի էլ Քուրէյշի սպաննուած է։
