ՊԷՅՕՂԼՈՒԻ ՄԷՋ ՈԳԵԿՈՉՈՒՄ

Պէյօղլուի Ս. Երրորդութիւն եկեղեցւոյ մէջ երէկ ոգեկոչուեցաւ Պատրիարքական Աթոռի երջանկայիշատակ գահակալներէն Տ. Իգնատիոս Արքեպիսկոպոս Քաքմաճեան, որ գաւազանագիրքին մէջ կ՚առանձնանայ՝ միայն տասներկու օր գահակալած ըլլալով։ Նկատի ունենալով, որ ան եղած էր Պէյօղլուի քարոզիչներէն՝ մարմինը ամփոփուած էր Ս. Երրորդութիւն եկեղեցւոյ շրջափակին։

Երէկ, Տ. Յարութիւն Վրդ. Տամատեանի հանդիսապետութեամբ, Ս. Երրորդութիւն եկեղեցւոյ մէջ տեղի ունեցաւ առաւօտեան ժամերգութիւն, որու աւարտին հոգելոյս պատրիարքի շիրմին գլուխը կատարուեցաւ հոգեհանգստեան պաշտօն։ Ներկայ էր նաեւ Տ. Գէորգ Աւ. Քհնյ. Չընարեան։

Հանդիսադիր Տ. Յարութիւն Վրդ. Տամատեան ոգեկոչման առթիւ հակիրճ տեղեկութիւններ փոխանցեց հոգելոյս Տ. Իգնատիոս Արքեպիսկոպոս Քաքմաճեանի մասին։