ՖԷՐԻԳԻՒՂԻ ՄԷՋ ՈԳԵՒՈՐ ՔԷՐՄԷՍ

Երէկ, Ֆէրիգիւղի ընտանիքը մեծ ոգեւորութիւն ապրեցաւ՝ թաղի Մէրամէթճեան վարժարանին ի նպաստ կազմակերպուած քէրմէսին առթիւ։ Ամանորի ընդառաջ կեանքի կոչուեցաւ այս ծրագիրը, որ առիթ դարձաւ ոգեւորութեան։ Ս. Վարդանանց եկեղեցւոյ յարակից «Նազար Շիրինօղլու» սրահի երդիքին տակ տեղի ունեցաւ քէրմէսը, որ կազմակերպուած էր ծնողաց միութեան, նաեւ դպրոցի համակիր տիկնանց կամաւոր աշխատանքով։

Քէրմէսի բացման փուլին ներկայ գտնուեցան Ֆէրիգիւղի եկեղեցւոյ թաղային խորհուրդէն ներկայացուցիչներ, ինչպէս նաեւ հոգեւոր հովիւ Տ. Կորիւն Աւ. Քհնյ. Ֆէնէրճեան, որ աղօթեց նախաձեռնութեան յաջողութեան համար։

Օրուան տեւողութեան մեծ եռուզեռ տիրեց սրահի երդիքին տակ։ Բոլոր այցելուները մօտիկ հետաքրքրութիւն ցուցաբերեցին՝ տաղաւարներու վրայ իրենց տրամադրութեան տակ դրուած իրերուն նկատմամբ։ Հուսկ, բոլորին միջեւ բարեմաղթութիւններ փոխանակուեցան մօտալուտ տարեմուտի առթիւ։