Լրահոս

ԺՈՂՈՎՐԴԱՎԱՐՈՒԹԵԱՆ ՀԱՄԱՐ ԳՈՐԾԱԿՑՈՒԹԻՒՆ

Եւրոխորհուրդի խորհրդարանական վեհաժողովի (ԵԽԽՎ) նախագահ Լիլիան Մորի-Փասքիէ երէկ շփումներ ունեցաւ Երեւանի մէջ, ուր Հայաստանի ղեկավարութեան կողմէ հիւրընկալուեցաւ ամենաբարձր մակարդակի վրայ։ Օրուան տեւողութեան ան տեսակցեցաւ Հանրապետութեան նախագահ Արմէն Սարգսեանի, Ազգային ժողովի նախագահ Արարատ Միրզոյեանի, վարչապետ Նիկոլ Փաշինեանի, Արտաքին գործոց նախարար Զօհրապ Մնացականեանի եւ այլ պաշտօնատարներու հետ։ ԵԽԽՎ-ի նախագահը յարգանքի այցելութիւն մը տուաւ նաեւ Ծիծեռնակաբերդ։

ՓՔՔ-Ի ԴԷՄ ՀԱՐՈՒԱԾՆԵՐ

Թուրքիա կը շարունակէ յամառ պայքար մղել ահաբեկիչներուն դէմ՝ մանաւանդ թիրախաւորելով երկրի հարաւային սահմաններու երկայնքով տեղակայուած ՓՔՔ-ն։
Թուրք զինեալ ուժերն ու ՄԻԹ-ը նախընթաց օր համատեղ գործողութիւնով մը հերթական անգամ լուրջ հարուած հասցուցին ՓՔՔ ահաբեկչական կազմակերպութեան։

ՊԵՐԼԻՆԻ ՄԷՋ ՀԱՅԱՍՏԱՆԵԱՆ ՏԱՂԱՒԱՐ

«Այ. Թի. Պի. Պերլին» միջազգային զբօսաշրջութեան ցուցահանդէսին այս տարի հայաստանեան միասնական տաղաւարին մէջ երկրի զբօսաշրջութեան գրաւչութիւնը ներկայացուցած են այդ ոլորտին մաս կազմող 14 ընկերութիւններ. ներկայացուած առաջարկներուն մէջ կան նաեւ շարք մը ծրարներ դրացի Վրաստանի հետ:
Երկիրը աւելի շատ ծանօթացնելու նպատակով, ցուցահանդէսի ծիրին մէջ, նախնական պայմանաւորուածութիւններ ձեռք բերուեցան նաեւ զբօսաշրջութեան գործարարութեան բազմաթիւ ներկայացուցիչներու, քաղաքական գործիչներու, գործարարներու, միջազգային էջատէրերու հետ, որոնք ծանօթացան հայկական զբօսաշրջութեան հնարաւորութիւններուն եւ երկրի հարուստ մշակութային ժառանգութեան:

ԵՐԱԽՏԱԳԻՏՈՒԹԵԱՆ ՏՈՒՐՔ

Գալուստ Կիւլպէնկեանի 150-ամեակին ձօնուած Երեւանի եւ Լիզպոնի ձեռնարկները կ՚առանձնանան թէ՛ իրենց մակարդակով եւ թէ իր աւանդի արժեւորման մտայնութեամբ:
Ազգային մեծանուն բարերարի յիշատակին թողարկուած դրոշմաթուղթերը կնքուեցան հանդիսաւոր արարողութիւններով: Աւելի քան հազար հանդիսատեսներու մասնակցութեամբ երկու փառաշուք համերգ: Ա­րեւմ­տեան Եւրո­պա­յի Հայ­րա­պե­տա­կան պա­տուի­րակ Տ. Խաժակ Արքեպիսկոպոս Պարսամեան տեսակցեցաւ համանուն հիմնարկի ղեկավարութեան հետ:

ՆԱԽԱԳԱՀ ԷՐՏՈՂԱՆ ՊԻՏԻ ՄԵԿՆԻ ՄՈՍԿՈՒԱ

Հանրապետութեան նախագահ Րէճէպ Թայյիպ Էրտողան կը պատրաստուի այցելել Մոսկուա՝ Ռուսաստանի նախագահ Վլատիմիր Փութինի հրաւէրին ընդառաջ։ Կը հաղորդուի, որ այս ուղեւորութիւնը նախատեսուած է ապրիլի 8-ին։

ՃԻՇԴ ՀԱՒԱՍԱՐԱԿՇՌՈՒԹԻՒՆ

Էմմանիւէլ Մաքրոնի տանտիրութեամբ Փարիզի մէջ բանակցութիւններ տեղի ունեցան՝ մասնակցութեամբ Եունքէրի, Մերքէլի եւ Ցզինփինի:
«Մենք կը տեսնենք աշխարհի շատ աշխոյժ զարգացում, կեդրոնները շարունակ կը տեղաշարժուին, ռազմավարական մրցակցութիւնը կրնայ ունենալ դրական գործօններ»:

Էջեր