Գոհունակութեամբ վերահասու կ՚ըլլանք, թէ «Արաս» հրատարակչութիւնը ներկայիս գրասէրներու տրամադրութեան տակ դրած է հայերէն նոր գիրք մը, որու հեղինակն է Վարդուհի Քալանթար։ «Կեդրոնական բանտի կիներու բաժինը» յուշագրութիւնով ներկայացուած են իսկապէս հետաքրքրական ու պատմական նշանակութեամբ վկայութիւններ։
Պաքըրգիւղի քաղաքապետութեան եւ Պաքըրգիւղի Մշակոյթի կեդրոնի ու ճեմատան նպաստով այս օրերուն տեղի կ՚ունենայ միջազգային նկարչութեան խառն ցուցահանդէս մը, որ կոչուած է՝ «Եթէ մարդը ուզէ» եւ որ երկրորդն է իր տեսակին մէջ։
Պէյօղլուի Սեն թ՚Անթուան կաթողիկէ եկեղեցւոյ մէջ երէկ երեկոյեան տեղի ունեցաւ հանդիսաւոր համերգ մը, որու յայտագրին մասնակցեցան մեր համայնքէն երկու արժէքաւոր արուեստագիտուհիներ՝ սոփրանօ Գարին Չուպուքճեան-Պոզքուրթ եւ երգեհոնահարուհի Աննա Գէորգեան-Ուղուրլուեան։
Համայնքային շրջանակները երէկ ողջունեցին մեր արժէքաւոր երիտասարդներէն Սերենա Էլվանի եւ Յարութիւն Քուրանի Ս. Պսակի խորհրդակատարութիւնը, որ տեղի ունեցաւ Պալաթի Ս. Հրեշտակապետ եկեղեցւոյ մէջ։
«Աւանդական» պարախումբի անդամները վերջին օրերուն մէկտեղուեցան Գարակէօզեանի համալիրէն ներս։ Դպրոցի «Ձմրան պարտէզ»ին մէջ կազմակերպուած հաւաքոյթը առիթ դարձաւ, որպէսզի խումբի անդամները իրարու հետ կարօտ յագեցնեն եւ յառաջիկայ ամրան վերաբերեալ ծրագիրները քննարկեն։
Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան երէկ ընդունեց Սեւ ծովեան տնտեսական համագործակցութեան կազմակերպութեան (ՍԾՏՀԿ) մօտ Հայաստանի Հանրապետութեան մշտական ներկայացուցիչ Սահակ Սարգսեանն ու ներկայացուցչութեան խորհրդական Նաղաշ Յակոբեանը։ Զրոյցի ընթացքին հիւրերը Ամեն. Ս. Պատրիարք Հօր բացատրութիւններ տուին ներկայացուցչութեան հիմնադրութեան 20-ամեակին առթիւ նախատեսուած յոբելենական ձեռնարկին շուրջ։
Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան երէկ հիւրընկալեց Ֆէրիգիւղի եկեղեցւոյ Ս. Վարդանանց դպրաց դաս-երգչախումբի ներկայացուցիչները։ Խումբը գլխաւորեց Տ. Շիրվան Քհնյ. Միւրզեան, որ դպրաց դասու նախագահն է։
Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան երէկ ընդունեց Գումգաբուի Դրսի Ս. Յարութիւն եկեղեցւոյ թաղային խորհուրդի ատենապետ Առուշ Թաշն ու գործակից ընկերները։ Զրոյցի տեւողութեան խորհրդակցութիւն մը տեղի ունեցաւ եկեղեցապատկան կալուածներու վերաբերեալ։
Կը տեղեկանանք, որ «Փոքրիկ» մանկապատանեկան կայքէջին կողմէ կազմակերպուած հեքիաթահաւաքը արդէն հասած է իր աւարտին։ Այսպէսով «Փոքրիկ»ի հեքիաթարանին մէջ կատարուած է համալրում։ Հեքիաթահաւաքին 6 երկրէ 39 գրող մասնակցութիւն բերած է՝ 50 հեքիաթով։
Թոփգաբուի Լեւոն-Վարդուհեան վարժարանին մէջ տեղի ունեցաւ առաջին դասարանի փոքրիկներու ընթերցման տօնը, ինչ որ մեծ խանդավառութեան առիթ դարձաւ։ Դպրոցի պարտէզին մէջ կազմակերպուած հանդէսին առթիւ հիւրընկալուեցան Թոփգաբուի Ս. Նիկողայոս եկեղեցւոյ թաղային խորհուրդէն Մուրատ Չաքան, կրթական մշակներ, ծնողներ, դպրոցի պատասխանատուներ եւ հիւրեր։
