Իզմիրի նորանշանակ առաջնորդ Հայր Մարթին Քըմեթեքի եպիսկոպոսական ձեռնադրութեան եւ պաշտօնի կոչման արարողութիւնը տեղի ունեցաւ երեքշաբթի, փետրուարի 2-ին, ժամը 17.30-ին, քաղաքի Սանթա Մարիա լատին կաթոլիկ եկեղեցւոյ մէջ։
Երէկ յետմիջօրէին, Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան Պատրիարքարանի մէջ ընդունեց Աննա Մարիա Պէյլունիօղլուն եւ Էօզկիւր Քայմաքը։
Հիւրերը քաղաքավարական սոյն այցելութեամբ ծանօթացան Ամեն. Ս. Պատրիարք Հօր հետ ու տեղեկութիւններ փոխանցեցին իրենց վերջերս լոյս տեսած «Kısmet Tabi» գրքին մասին։
Ըստ Հայ Եկեղեցւոյ օրացոյցին, անցեալ շաբաթավերջին տեղի ունեցաւ Ս. Սարգիսի եւ Ս. Մարտիրոսի տօնակատարութիւնը։ Սոյն տօնական մթնոլորտը առիթ հանդիսացաւ, որ Գնալը կղզիի Ս. Գրիգոր Լուսաւորիչ եկեղեցւոյ բարերարներէն՝ Սարգիս Թաշճեան եւ Թաշճեան ընտանիքի բոլոր անդամները յիշատակուին Գնալը կղզիի մէջ։
Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան, երէկ, ժամը 11.00-ին, Պատրիարքարանի պաշտօնական ընդունարանին մէջ ընդունեց Թուրքիոյ Կաթողիկէ հայոց վիճակաւոր Տ. Լեւոն Արք. Զեքիեանը՝ ընկերակցութեամբ Տ. Աբրահամ Ծ. Վրդ. Ֆրատեանի։ Հանդիպման ներկայ եղան Պատրիարքական փոխանորդ Տ. Գրիգոր Ա. Քհնյ. Տամատեան, Տ. Յովակիմ Աբեղայ Սերովբեան եւ Միջեկեղեցական յարաբերութեանց տեսուչ Տ. Տրդատ Ա. Քհնյ. Ուզունեան։
Երէկ, Շիշլիի գերեզմանատան մէջ հոգեհանգստեան պաշտօն տեղի ունեցաւ բարեյիշատակ Յովհաննէս եւ Մկրտիչ Էսաեան եղբայրներու հոգւոցն ի հանգիստ։ Էսաեան հարազատները ոգեկոչուեցան բիւր յարգանքով։
Ղալաթիոյ Ս. Գրիգոր Լուսաւորիչ եկեղեցւոյ մէջ երէկ մատուցուեցաւ Ս. Պատարագ՝ ձեռամբ Տ. Յարութիւն Աբեղայ Տամատեանի, որ խօսեցաւ նաեւ խրատական մը։ Ս. Պատարագի աւարտին կատարուեցաւ հոգեհանգստեան պաշտօն, որով ոգեկոչուեցան Կէտիկփաշայի «Հրանդ Տինք» դպրոցի սատարողները։
Կէտիկփաշայի Հրանդ Տինք դպրոցը կը տոկայ՝ հակառակ քորոնաժահրի համավարակի դժուարութիւններուն:
Հերթական հանգանակութիւնը կը կազմակերպուի առանց սիրոյ սեղանի, Ամեն. Ս. Պատրիարք Հօր հովանաւորութեամբ:
Տ. Թաթուլ Ծ. Վարդապետ Անուշեան դարմանում կը տեսնէ Սուրբ Փրկիչ Ազգային հիւանդանոցի մէջ:
Պատրիարքական Աթոռի աղբիւրները պաշտօնական հաղորդագրութիւն մը հրապարակեցին՝ ընկերային ցանցերու վրայ շրջանառութեան դրուած զանազան պնդումներու լոյսին տակ: Անհրաժեշտ դեղօրայքը ապահովելու նպատակով շարժման անցած են համայնքային շրջանակները:
Երէկ, ժամը 13.30-ին, Հանրապետութեան նախագահութեան դիւանապետներէն Հասան Տողանի հիւրընկալութեամբ՝ հայ, յոյն, ասորի եւ հրեայ համայնքներէ երիտասարդներ ընդունուեցան Պեշթեփէի համալիրէն ներս։ Սոյն հանդիպման յանուն Պատրիարքական Աթոռոյ մասնակցեցան, Պատրիարքարանի «Մենթի-Մենթոր» ծրագրէն 14 երիտասարդներ՝ առաջնորդութեամբ ծրագրի վարիչներէն Մերի Թաքսի Տեւէճեանի եւ Արաս Եոլուսեւէրի։
Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան երէկ Գումգաբուի մէջ հիւրընկալեց Սեւ ծովեան տնտեսական համագործակցութեան կազմակերպութեան մօտ Հայաստանի Հանրապետութեան մշտական ներկայացուցիչ Սահակ Սարգսեանը, որուն ընկերացաւ ներկայացուցչութեան խորհրդական Նաղաշ Յակոբեան։
