Երէկ, Աթոռանիստ Մայր եկեղեցւոյ համալիրէն ներս կրօնական եւ աշխարհիկ արարողութիւններ տեղի ունեցան՝ նախագահութեամբ Պատրիարքական ընդհանուր փոխանորդ Տ. Արամ Արք. Աթէշեանի։ Համայնքային շրջանակները հերթական անգամ համախմբուեցան Գումգաբուի մէջ, ուր Պատրիարքական Աթոռի հովանաւորութեամբ սիրոյ սեղան սարքուեցաւ ի նպաստ Կէտիկփաշայի «Հրանդ Տինք» վարժարանին։
Սաղիմական Ս. Ծննդեան տօնակատարութեանց մասնակցելու նպատակաւ Պատրիարքական ընդհանուր փոխանորդ Տ. Արամ Արք. Աթէշեանի արտօնութեամբ, Գատըգիւղի Ս. Թագաւոր եկեղեցւոյ քարոզիչ Տ. Յարութիւն Աբեղայ Տամատեան 17 յունուար 2019, երեքշաբթի, մեկնեցաւ Ս. Երուսաղէմ։ Հայր սուրբը որպէս ուխտաւոր, միացաւ Պոլիսէն ուխտաւորաբար Ս. Երկիր ժամանած խումբին, զոր կ՚առաջնորդէին Սեւան Կսրկ. Արապեան եւ Միհրան Սաթըլմըշ։
Թուրքիոյ Հայ կաթողիկէ հասարակութեան վիճակաւոր Տ. Լեւոն Արք. Զեքիեան նախընթաց օր Սաքըզաղաճըի Արքեպիսկոպոսարանին մէջ հիւրընկալեց Իսթանպուլի գլխաւոր միւֆթի Փրոֆ. Հասան Քեամիլ Եըլմազը։ Այցելութեան ընթացքին միւֆթիին ընկերացաւ իր օգնականը՝ Ճանէր Աքտեմիրլի։
Մեր համայնքէն երկու արուեստագիտուհիներ՝ Սօսի Ճնտոյեան եւ Հայկան Քըլըչճան երէկ բացին համատեղ ցուցահանդէս մը, որ կազմակերպուած է Աթագիւղի «Եունուս Էմրէ» մշակոյթի կեդրոնին մէջ։ «Գոյներու սէրը» խորագրեալ այս ցուցահանդէսին Սօսի Ճնտոյեան կը մասնակցի իր երանգաւորման, իսկ Հայկան Քըլըչճան՝ նկարչական ստեղծագործութիւններով։
Մեր համայնքի երէց սերունդի կրթական մշակներէն Լիժի Փուլճու Չիզմեճեան շաբաթավերջին մակագրեց իր գիրքերը Նոթրը Տամ տը Սիոն ֆրանսական լիսէին մէջ։ Որպէս այդ լիսէի երիցագոյն սաներէն մին՝ ան մասնակցութիւն բերաւ շրջանաւարտից տարեկան աւանդական հաւաքին։
Պատրիարքական ընդհանուր փոխանորդ Տ. Արամ Արք. Աթէշեան երէկ հիւրընկալեց ԱՔ կուսակցութեան կողմէ Ֆաթիհի քաղաքապետի թեկնածու առաջադրուած Էրկիւն Թուրանը եւ իր գործակիցները։ Նոյն առթիւ Գումգաբու փութացին Ֆաթիհ գաւառակի սահմաններէն ներս գտնուող մեր եկեղեցիներու թաղային խորհուրդներու ատենապետները։
ՍԷՎ հիմնարկի նախաձեռնութեամբ անցեալ շաբաթավերջին տեղի ունեցաւ շահեկան ասուլիս մը, որ մաս կը կազմէր «Երիտասարդներու հետ ձեռք ձեռքի» ծրագրին։ Այս ծրագրին համար մասնաւոր յանձնախումբ մը կը գործէ ՍԷՎ-էն ներս եւ այս ասուլիսը այդ մէկուն կողմէ կազմակերպուած երկրորդ ձեռնարկն է։
Երէկ, հաճոյքն ունեցանք խմբագրատանս մէջ հիւրընկալելու Կէտիկփաշայի «Հրանդ Տինք» վարժարանի կամաւոր հոգաբարձու Արթօ եւ Դալար Հորոզօղլու ամոլը։ Հաճելի զրոյցի ընթացքին անոնք մեզի բացատրութիւններ տուին դպրոցի այժմու վիճակին շուրջ՝ շաբաթավերջին նախատեսուած սիրոյ սեղանին ընդառաջ։
Պատրիարքական ընդհանուր փոխանորդ Տ. Արամ Արք. Աթէշեան երէկ Գումգաբուի մէջ հիւրընկալեց Կէտիկփաշայի «Հրանդ Տինք» վարժարանի կամաւոր հոգաբարձու Արթօ-Դալար Հորոզօղլու ամոլը, նաեւ տնօրէնուհի Հերիքնազ Աւագեանը։ Այս շաբաթավերջին Գումգաբուի մէջ դպրոցին ի նպաստ պիտի սարքուի սիրոյ սեղան, որու ընդառաջ պատասխանատուները ներկայացան Պատրիարքարան, ուր նորին սրբազնութեան փոխանցեցին զանազան տեղեկութիւններ։
Շաբաթավերջին Աթագիւղի «Սինան Էրտէմ» մարզասրահին մէջ տեղի ունեցաւ «All-Star 2019» պասքեթպոլի մեծ շոու մը։ Միջազգային օրացոյցի վրայ տեղ գտած ծրագիր մըն է այս մէկը, որուն այս տարի հրաւիրուած էին Շիշլի մարզակումբի նախկին աստղերէն Մաժակ Չաքըր եւ Գառնի Աթընչ։
