Թրքահայ կեանք

Ե­րէկ, հա­ճոյքն ու­նե­ցանք խմբագ­րա­տանս մէջ հիւ­րըն­կա­լե­լու Հա­յաս­տա­նի Հան­րա­յին ռա­տիո­յի ընդ­հա­նուր տնօ­րէն Մարկ Գրի­գո­րեանն ու իր օգ­նա­կա­նը՝ Ա­նի Մի­նա­սեա­նը։ Ինչ­պէս հա­ղոր­դած էինք, Մարկ Գրի­գո­րեան եւ Ա­նի Մի­նա­սեան շա­բա­թէ մը ի վեր կը գտնուէին քա­ղա­քիս մէջ։

Պատրիարքական ընդհանուր փոխանորդ Տ. Արամ Արք. Աթէշեան այսօր յետմիջօրէի ժամերուն Երեւան-Իսթանպուլ ուղիղ թռիչքով կը վերադառնայ քաղաքս։

Պէզճեան Մայր վարժարանի երդիքին տակ Թարգմանչաց տօնին առթիւ տեղի ունեցաւ հանդէս մը։ Տնօրէնուհի Թալին Նայիր ելոյթ մը ունենալով աշակերտներուն հերթական անգամ յիշեցուց հայ տառերու, լեզուի եւ մշակոյթի կենսական նշանակութիւնը։

ՍԷՎ հիմնարկը վերջերս ստեղծած է «Երիտասարդներու հետ ձեռք ձեռքի» կոչուած յանձնախումբ մը։ Այս վերջինը անցեալ շաբաթ Ֆէրիգիւղի «Նազար Շիրինօղլու» սրահին մէջ ասուլիս մը կազմակերպեց գրող Արէտ Վարդանեանի հետ։

Գումգաբուի Ս. Աստուածածին Աթոռանիստ Մայր եկեղեցւոյ մէջ յուղարկաւորութեան արարողութիւն:
Համայնքային շրջանակները խոնարհում բերին նորոգ հանգուցեալ բարերար Պետրի Եալընի յիշատակին առջեւ:

Երէկ, հաճոյքն ունեցանք խմբագրատանս մէջ հիւրընկալելու Տատեան վարժարանէն հիւրեր։ Այսպէս, մեր այցելութեան փութացած էին դպրոցի աշակերտներէն Հրակ Չաքմաքճը եւ Նորա Իփեքճի, նաեւ ուսուցչուհիներէն Ժպտուն Զուռնաճը եւ Երանուհի Պալճը։

Այս տարի եւս Գատըգիւղի ընտանիքը, Ս. Թագաւոր եկեղեցւոյ քարոզիչ Տ. Յարութիւն Աբեղայ Տամատեանի եւ երէց Տ. Գրիգոր Ա. Քհնյ. Տամատեանի առաջնորդութեամբ, առիթն ունեցաւ մէկտեղուելու Ս. Թարգմանչաց Վարդապետաց տօնակատարութեան խորհուրդին շուրջ։ Թաղի Ս. Թագաւոր եկեղեցւոյ հովանաւորութեամբ կատարուած հանդիսութիւններով թէ՛ կրտսեր եւ թէ երէց սերունդի անդամներ հաղորդ դարձան Մշակոյթի շաբթուան փոխանցած պատգամին։

Գատըգիւղի Արամեան-Ունճեան վարժարանին մէջ վերջերս փայլուն հանդիսութիւն մը տեղի ունեցաւ Ս. Թարգմանչաց տօնին առթիւ։ Հայ մշակոյթի ձօնուած հոկտեմբեր ամսուան տեւողութեան դպրոցի բոլոր դասարաններու աշակերտները մասնակցութիւն բերին մշակուած ծրագրին։

Գումգաբուի երէկուան հանգանակութեան արդիւնքը պոռթկում մը եղաւ համայնքէն ներս վարժարաններու ապագային համար վերջերս խորանալ սկսած յոռետեսութեան դէմ: Կեդրոնականի սիրոյ սեղանին նախագահեց Պատրիարքական ընդհանուր փոխանորդ Տ. Արամ Արք. Աթէշեան. «Եթէ եկեղեցին ու դպրոցը տկարանան, ապա յոյս չենք կրնար ունենալ ազգի գոյութեան համար»:

Խոր ցաւով վերահասու եղանք, որ իր մահկանացուն կնքած է մեր համայնքի երէց սերունդի շատ սիրուած ու յարգուած դէմքերէն, նաեւ երախտաշատ բարերարներէն Պետրի Եալըն։ Իր կորուստը խոր յուզում պատճառած է համայնքային շրջանակներուն՝ հաշուի առնելով, որ Պետրի Եալըն երկար տասնամեակներ եղած էր մեր հաստատութիւնները կանգուն պահելու նպատակաւ ուղղուած պայքարի առանցքային դէմքերէն մին։