Պատրիարքական ընդհանուր փոխանորդ Տ. Արամ Արք. Աթէշեան երէկ հիւրընկալեց Ղալաթիոյ Ս. Գրիգոր Լուսաւորիչ եկեղեցւոյ եւ Կեդրոնական վարժարանի խնամակալութեան ատենապետ Յարութիւն Էպէօղլուն եւ իր գործակից ընկերները։ Ներկայ էր նաեւ Ղալաթիոյ հոգեւոր հովիւ Տ. Զատիկ Վրդ. Պապիկեան։
Պատրիարքական ընդհանուր փոխանորդ Տ. Արամ Արք. Աթէշեան նախընթաց երեկոյեան Գումգաբուի մէջ հիւրընկալեց Երիտասարդաց յանձնախումբի անդամները։ Նորին սրբազնութիւնը ուրախութիւն յայտնեց Պատրիարքարանի երդիքին տակ երիտասարդներու ներկայութեան համար։
Երուսաղէմի հայոց պատրիարք Տ. Նուրհան Արք. Մանուկեան վերջին օրերուն այցելութիւն մը տուաւ քաղաքս։ Սա իր հերթական այցելութիւններէն մին էր։ Այսօր ան կը վերադառնայ Սուրբ Քաղաք։
Համայնքային վաքըֆներու հարթակի (VADİP) ատենադպիր Յարութիւն Շանլը շաբաթավերջին հրաժարեցաւ այդ պաշտօնէն։ Յարութիւն Շանլը ընկերային ցանցերու վրայ հրապարակեց իր հրաժարականը, որու բովանդակութեան մէջ տեղեկացուցած է, որ կը լքէ VADİP-ի ատենադպրի, ինչպէս նաեւ Վաքըֆներու խորհուրդի մօտ փոքրամասնութիւններու գրասենեակի յարակից գործող արարողակարգային կարգադրութիւններու ղեկավարի պաշտօնը։
Գոհունակութեամբ վերահասու կ՚ըլլանք, որ վաղը (կիրակի), առաւօտեան ժամը 10.00-ին, մեներգչուհի Սիպիլ հանդէս պիտի գայ CNN Türk հեռուստակայանէն։ Սիպիլ պիտի ըլլայ հաղորդավար Հաքան Չելիքի հիւրը՝ «Haftasonu keyfi» ծրագրի ընթացքին։
Պատրիարքական ընդհանուր փոխանորդ Տ. Արամ Արք. Աթէշեան երէկ ընդունեց Կէտիկփաշայի «Հրանդ Տինք» վարժարանի պատասխանատուները։ Զրոյցի ընթացքին դպրոցի ներկայացուցիչները տեղեկացուցին, որ աշակերտութեան թիւը այս տարի 120 հոգի կը կազմէ։
Գումգաբուի ընտանիքը ներկայիս նախապատրաստական աշխատանքներու ձեռնարկած է՝ Պէզճեան Մայր վարժարանի ի նպաստ սարքուելիք տարեկան աւանդական սիրոյ սեղանի սեմին։ Երէկ երեկոյեան, Աթոռանիստ Մայր եկեղեցւոյ Պէզճեան սրահին մէջ համայնքային շրջանակներէ ներկայացուցիչներու մասնակցութեամբ տրուեցաւ սիրոյ սեղանի պատրաստական աշխատանքներուն մեկնարկը։
Պէզճեան Մայր վարժարանին մէջ 2018-2019 կրթական շրջանը սկսաւ մեծ խանդավառութեամբ։ Պատմական դպրոցը այս առթիւ ողջունեց իր 188-րդ վերամուտը՝ դռները լայն բացած իր սիրասուն սաներուն առջեւ։ Նոր տարեշրջանի մեկնարկին առթիւ աշակերտներուն հետ դպրոցին մէջ համախմբուեցան նաեւ իրենց ծնողները։
Գալֆաեան Տան մէջ 2018-2019 կրթական շրջանը սկսաւ տօնական մթնոլորտով։ Վերամուտի առաջին օրը բնորոշուեցաւ հանդէսով մը, որուն ներկայ էին խնամակալութեան ատենապետուհի Տիանա Գամբարոսեան եւ իր գործակից ընկերները, հիմնադրի ներկայացուցիչ Թամար Քարասու, ուսուցչական կազմը, ծնողներ եւ հիւրեր։
Արէտ Երկանեան բժիշկներու թոյլտուութեամբ նախընթաց օր հիւանդանոցէն մեկնեցաւ իր բնակարանը:
Համայնքային շրջանակները կ՚ողջունեն յայտնի բարերարի դարմանման դրական ընթացքը եւ արձանագրած յառաջընթացը:
