Պատրիարքական փոխանորդ Տ. Գրիգոր Աւ. Քհնյ. Տամատեան տասնօրեայ այցելութիւն մը կու տայ Հայաստան, ուր կ՚իջեւանի Մայր Աթոռ Սուրբ Էջմիածնի մէջ:
Հայագիտական միջազգային քոնկրէսին համար մշակուած է քառօրեայ աշխատանքային ծրագիր մը՝ բազմաթիւ հեղինակաւոր մասնագէտներու մասնակցութեամբ եւ յարակից ձեռնարկներով:
Այս առաւօտ հաճոյքն ունեցանք խմբագրատանս մէջ հիւրընկալելու սփիւռքահայ յայտնի մտաւորական՝ տքթ. Յակոբ Այնթապլեանը, որ վերջին տարիներուն Հայաստան հաստատուած է եւ այս օրերուն ձեռնարկի մը առթիւ քաղաքս կը գտնուի։ Այցելութեան ընթացքին իրեն ընկերացան Երեւանէն՝ լրագրող Վահագն Զաքարեան եւ մեր համայնքէն մեներգիչ Արթիւր Պաղտասարեան, որ կ՚ուղեկցի իրեն։
Երէկ, 15 Յուլիսի ժողովրդավարութեան եւ ազգային միասնականութեան օրուան առթիւ բովանդակ Թուրքիոյ մէջ տեղի ունեցան հանդիսաւոր արարողութիւններ։
Յայտնի գրող՝ տքթ. Յակոբ Այնթապլեան այս օրերուն կ՚այցելէ Պոլիս։ Ան օդակայանին մէջ դիմաւորուած է մեներգիչ Արթիւր Պաղտասարեանի կողմէ, որ զանազան ձեռնարկներու ընթացքին կը մեկնաբանէ հեղինակի գործերու հիման վրայ յօրինուած կտորներ։
Տ.Տ. Գարեգին Բ. Ամենայն Հայոց Կաթողիկոսը երէկ Մայր Աթոռ Սուրբ Էջմիածնի մէջ ընդունեց բանասէր տքթ. Սեւան Տէյիրմենճեանը, որ վերջին օրերուն գիտաժողովի մը մասնակցեցաւ Երեւանի մէջ։ Օգտուելով իր կեցութեան առիթէն ան քաղաքավարական այցելութիւն մը տուաւ Վեհափառ Հայրապետին՝ ստանալու համար իր օրհնութիւնը եւ արտայայտելու համար իր որդիական ակնածանքը։
Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան երէկ երեկոյեան մասնակցեցաւ քաղաքիս Ֆրանսական պալատին մէջ կազմակերպուած պաշտօնական ընդունելութեան։ Ֆրանսայի Ազգային տօնին՝ 14 յուլիսի առթիւ սարքուած ընդունելութիւնը այս տարի քանի մը օր կանուխ տեղի ունեցաւ։
Գուրուչէշմէի Երեւման Ս. Խաչ եկեղեցւոյ թաղային խորհուրդի ատենապետ Լեւոն Քուզիքօղլու եւ կարգ մը անդամներ երէկ այցելութիւն մը տուին Պէշիկթաշի գաւառապետ Օղուզհան Պինկէօլին։
Հայաստանեայց Առաքելական Եկեղեցին երէկ հանդիսաւորապէս նշեց Տէր Յիսուս Քրիստոսի Պայծառակերպութեան տօնը։ Այս տարի եւս Վարդավառը առիթ դարձաւ, որպէսզի հաւատացեալները թէ՛ տաղաւարի հրճուանքը ապրին եւ թէ աւանդութիւններու վերապրումով բարձր տրամադրութեամբ համակուին։
Սկիւտարի Ս. Խաչ եկեղեցւոյ մէջ երէկ պատարագեց Տ. Գասպար Աբեղայ Կարապետեան, որ խօսեցաւ նաեւ քարոզ մը։ Արարողութեան ներկայ էին Տ. Նաթան Քհնյ. Արապեան, Տ. Ներսէս Քհնյ. Այվազեան եւ Տ. Մելքոն Քհնյ. Փընարճեան։
ՈՒԷՖԱ-ի կեդրոնէն ներս, որ Զուիցերիոյ Նիոն քաղաքին մէջ կը գտնուի, երէկ տեղի ունեցաւ Եւրոպայի ֆութսալի ախոյեաններու լիկի որակաւորման փուլի վիճակահանութիւնը։
