Մխիթարեան վարժարանին մէջ Բարեկենդանի առթիւ տեղի ունեցան իրերայաջորդ երկու խրախճանքներ, որոնք բացառիկ ոգեւորութեան առիթ դարձան։ Այս խրախճանքները թէ՛ աշակերտներուն մօտ բարձր տրամադրութիւն ստեղծեցին եւ թէ Մեծ պահոց ընդառաջ առիթ դարձան, որպէսզի անոնք թարմացնեն իրենց գիտելիքները։
Պաքըրգիւղի Տատեան վարժարանին մէջ նախընթաց օր տեղի ունեցաւ Բարեկենդանի խրախճանք մը, որ մեծ խանդավառութեան առիթ դարձաւ։
Կեդրոնական վարժարանին մէջ երէկ հիւրընկալուեցաւ յայտնի դերասան Գէորգ Մալիքեան, որ ասուլիսի ձեւաչափով հաճելի զրոյց մը ունեցաւ ուսուցչական կազմի անդամներուն եւ աշակերտութեան հետ։
Մխիթարեան վարժարանի մէջ երէկ երեկոյեան տեղի ունեցաւ «Türkiye Florasına Katkıda Bulunan Ermeni Botanikçiler» գիրքին շնորհանդէսը, որուն պատուոյ հիւրն էր Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան։ Հարկ է նշել, որ այս գիրքը լոյս տեսած է «Փարոս» հրատարակչութենէն։
Գատըգիւղի Արամեան-Ունճեան վարժարանին մէջ կազմակերպուած Բարեկենդանի խրախճանքը առիթ հանդիսացաւ մեծ ոգեւորութեան։ Թէ՛ դպրոցի դասարաններուն եւ թէ յարակից սանուց միութեան սրահին մէջ կեանքի կոչուեցաւ յայտագիրը, որու ընթացքին տղաքը թէ՛ հաղորդ դարձան աւանդութիւններուն եւ թէ ապրեցան ուրախ պահեր։
Պաքըրգիւղի Տատեան վարժարանին մէջ հիւրընկալուեցաւ «Հապա եթէ»ի աշխատակազմէն Գայիանէ Կաւրիլօֆ, որ շուրջ տարիէ մը ի վեր աշխատանք կը տանի դպրոցի սաներուն հետ։ «Հապա եթէ»ն առցանց հարթակ մըն է, ուր հայերէնի ուղղեալ գործունէութիւն կը ծաւալուի։
Գալֆաեան տան մէջ տեղի ունեցաւ Բարեկենդանի խրախճանք մը, որով ստեղծուեցաւ բարձր տրամադրութիւն։ Հանդէսի ընթացքին տղաքը նախ հաղորդ դարձան Վարդանանց տօնի իմաստին, իսկ աւելի վերջ տօնախմբեցին Բարեկենդանը։
Երեւանի քաղաքապետարանը կազմակերպած է դրամաշնորհի բաց մրցոյթ մը՝ ութ մշակութային գործիչներու յոբելեաններուն ձօնուած ծրագիրներու համար։ Քաղաքապետարանին կողմէ յայտարարուած մրցոյթին մէջ ընդգրկուած արուեստագէտներու շարքին է անմոռանալի բանաստեղծ Զահրատը։
Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան նախընթաց օր հիւրընկալեց Թրքահայ ուսուցչաց հիմնարկի վարչութեան ատենապետ Սարգիս Քիւլէկէչն ու գործակից ընկերները։ Հարկ է նշել, որ հիմնարկի վարչութիւնը նոր անդամներով համալրուած է եւ այս առթիւ անոնք ծանօթացուեցան Ամեն. Ս. Պատրիարք Հօր։
Շիշլի մարզակումբի վարչութեան ատենապետ Ալէն Թեքպըչաք եւ գործակիցները մէկտեղուեցան մարմնամարզի ճիւղի մարզիկներուն, մարզիչներուն եւ պատասխանատուներուն հետ։
