ԱՔ կուսակցութեան կողմէ Շիշլիի քաղաքապետի թեկնածու առաջադրուած Կէօքհան Եիւքսէլ այցելեց Շիշլի մարզակումբ։ Վարչութեան ատենապետ Ալէն Թեքպըչաք եւ գործակից ընկերները ջերմ մթնոլորտի մը մէջ հիւրընկալեցին Կէօքհան Եիւքսէլը, որ անմիջական զրոյցի ընթացքին բացատրութիւններ տուաւ իր ծրագիրներուն շուրջ։
Երէկ, Ֆէրիգիւղի Մէրամէթճեան վարժարանի աշակերտները 8 մարտի Համաշխարհային կանանց օրուան առթիւ հանդէս մը ներկայացուցին, ինչ որ առիթ դարձաւ խանդավառութեան։ Թաղի «Նազար Շիրինօղլու» սրահի երդիքին տակ տեղի ունեցաւ ձեռնարկը, որու ընթացքին տղաքը իրենց ելոյթներով արժանացան ծափահարութիւններու։
Գոհունակութեամբ վերահասու կ՚ըլլանք, թէ մեր համայնքի արժէքաւոր ճարտարագէտներէն Նազար Շիկահեր վերջերս արժանացած է կարեւոր մրցանակի մը։ Այսպէս, Թուրքիոյ «Elle Decoration» պարբերաթերթին կողմէ կազմակերպուած «EDIDA 2024»ի շրջանակներէն ներս Նազար Շիկահերին տրուած է մրցանակ մը։
Երէկ, Գումգաբուի Ս. Աստուածածին Աթոռանիստ Մայր եկեղեցւոյ մէջ Տ. Արամ Արք. Աթէշեան հանդիսատեպեց Մեծ պահքի շրջանի Միջինքին։
Ֆէրիգիւղի Ս. Վարդանանց եկեղեցւոյ թաղային խորհուրդը հաղորդեց, որ թաղի Մէրամէթճեան վարժարանի տնօրէնը փոխուած է։ Այսպէս, դպրոցի նոր տնօրէնուհին է Մարալ Էօզտաղ, որ այս պաշտօնին մէջ կը յաջորդէ Սեսիլ Նարօտ Քարահիսարիտիսին, որ ունեցաւ կարճ պաշտօնավարութեան շրջան մը։
«Արաս» հրատարակչութեան աղբիւրները երէկ պաշտօնապէս տեղեկացուցին, որ ստեղծուած է «Եսայեան» մշակոյթի եւ գրականութեան միութիւնը։ Նորաստեղծ միութիւնը հիմնուած է «Արաս»ի հովանոցին ներքեւ եւ պիտի գործէ հրատարակչութեան համալիրէն ներս։
Գատըգիւղի Արամեան-Ունճեան վարժարանէն խումբ մը սաներ վերջերս շրջայց մը կատարեցին դէպի Վոսփորի արեւելեան ափը։ Այսպէս, դպրոցի Ե. եւ Զ. դասարանի աշակերտները այցելեցին Գանտիլլիի աստղադիտարանը, որ կը գործէ Պողազիչի համալսարանի հովանաւորութեան ներքեւ։
Պէյօղլուի ընտանիքը այս շաբաթավերջին նշեց Լուսաւորիչ դպրաց դաս-երգչախումբի հիմնադրութեան 95-ամեակը։ Ս. Երրորդութիւն եկեղեցւոյ «Նարեկեան» սրահին մէջ տեղի ունեցաւ «Երիտասարդ լուսաւորիչներ» խորագրով համերգ մը, որ յատկանշական էր յոբելենական ծրագրի շրջանակէն ներս։
Տ. Ներսէս Քհնյ. Այվազեան շաբաթավերջին հովուական այցելութիւն մը տուաւ Էլազըղի հայ համայնքին։ Ս. Նշան մատրան մէջ կատարուեցաւ Արեւագալի ժամերգութիւն, որու աւարտին տէր հայրը քարոզեց նիւթ ունենալով Մեծ պահքն ու անոր կիրակիները, պահքի իմաստը, ապաշխարութեան կարեւորութիւնը եւ ներումը:
Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան երէկ Արեւագալի արարողութեան նախագահեց Գատըգիւղի Ս. Թագաւոր եկեղեցւոյ մէջ, ուր ներկայ էր նաեւ հոգեւոր հովիւ Տ. Զօհրապ Քհնյ. Ճիվանեան։ Արարողութեան մասնակցեցան նաեւ թաղի Արամեան-Ունճեան վարժարանէն խումբ մը սաներ՝ հսկողութեամբ տնօրէնուհի Թալին Պէրպէրօղլուի եւ ուսուցչուհի Աննա Սարը Սեչքինի։
