Ամերիկայի Միացեալ Նահանգներու եւ Անգլիոյ հետախուզութեան ծառայութիւններու՝ CIA-ի եւ MI6-ի ղեկավարներ՝ Ուիլիըմ Պէօռնս եւ Ռիչըրտ Մուր յօդուած մը հրապարակեցին «Financial Times»ի մէջ։ Այսպիսի համատեղ ստորագրութեամբ յօդուածի մը հրապարակումը աննախընթաց երեւոյթ մըն է։
Հայաստանի ֆութպոլի ազգային հաւաքականը լաւ սկիզբ մը ըրաւ ՈՒԷՖԱ-ի ազգերու լիկին։ Այս մրցաշարքի C լիկի չորրորդ խմբակին մաս կը կազմէ Հայաստանի հաւաքականը, որ Երեւանի մէջ 4-1 արդիւնքով պարտութեան մատնեց Լեթոնիան։
Երեւանի մօտ Իրանի դեսպան Մեհտի Սոպհանի երէկ հերթական անգամ անդրադարձաւ Հարաւային Կովկասի հաղորդակցային ուղիներու հաւանական ապաշրջափակման։ Ան վերահաստատեց Թեհրանի դիրքորոշումը, ըստ որու ապաշրջափակումը որեւէ անպատեհութիւն չունի, սակայն ապահովաբար այդ մէկը պէտք է տեղի ունենայ երկիրներու ազգային եւ պետական ինքնիշխանութեան ներքեւ։
Ամերիկահայ գիտնական, ձեռներէց եւ բարերար Նուպար Աֆէեան կը նախատեսէ նոր ներդրումներ ընել Հայաստանի մէջ։ «Արմէնփրէս»ի հաղորդումներով, Նուպար Աֆէեանի «Afeyan Philanthropies» կազմակերպութիւնը, որու առաքելութիւնն է աւելի լաւ աշխարհ մը կառուցելու նպատակով լուծումներ գտնել, տեղեկացուց, որ Աֆէեան յանձնառու կը մնայ Հայաստանի աջակցութեան գործին մէջ։
Երէկ, Իտալիոյ վարչապետ Ճիորճիա Մելոնի Հռոմի մէջ հիւրընկալեց Ատրպէյճանի նախագահ Իլհամ Ալիեւը։ Այս առթիւ ան աջակցութիւն յայտնեց Երեւանի եւ Պաքուի միջեւ կայուն խաղաղութեան հաստատման։
Հայաստանի վարչապետ Նիկոլ Փաշինեան պիտի մասնակցի ՊՐԻՔՍ-ի գագաթաժողովին։ «Արմէնփրէս»ի հաղորդումներով, վարչապետի բանբերը՝ Նազելի Պաղտասարեան երէկ հաստատեց այս տեղեկութիւնը, որուն աւելի առաջ անդրադարձած էր նաեւ Հայաստանի արտաքին գործոց փոխ-նախարար Մնացական Սաֆարեան։
Երեւանի մէջ այս երկուշաբթի պիտի սկսի եռօրեայ միջազգային համաժողով մը, որ կազմակերպուած է Հայաստանի արտաքին գործոց նախարարութեան կողմէ։ «Երեւանեան երկխօսութիւն» կը կոչուի այս համաժողովը, որուն ընդառաջ Հայաստանի արտաքին գործոց նախարար Արարատ Միրզոյեան ըսաւ. «Մեր տարածաշրջանը՝ Հարաւային Կովկասը, որ պատմականօրէն գտնուած է մշակութային եւ խոշոր առեւտրային ուղիներու հատման կէտին, այսօր կանգնած է կարեւոր խաչմերուկի մը վրայ։
Ամերիկայի Միացեալ Նահանգները, Անգլիան եւ Եւրոմիութիւնը մտադիր են առաջին միջազգային համաձայնագիրը ստորագրելու՝ արհեստական բանականութեան կիրառման վերաբերեալ։ «Արմէնփրէս»ի հաղորդումներով, այս փաստաթուղթը պարտադիր իրաւաբանական ուժ պիտի ունենայ։
Ռուսաստանի նախագահ Վլատիմիր Փութին յայտարարեց, որ եթէ Ուքրայնա դէպի Եւրոպա բնական կազի տարանցման վերաբերեալ համաձայնագիրը չերկարաձգէ, ապա «Թրքական հոսք» խողովակաշարի վրայով փոխադրումը կրնայ աւելցուիլ։
Ֆրանսայի Հանրապետութեան նախագահ Էմմանիւէլ Մաքրոն երէկ վարչապետ նշանակեց Միշէլ Պառնիէն։ Երկրէն ներս տեղի ունեցած արտահերթ խորհրդարանական ընտրութեան հիման վրայ ստեղծուած էր քաղաքական բարդ հաւասարակշռութիւն մը, որու պայմաններուն ներքեւ երեք ամիսէ ի վեր նոր կառավարութեան մը ձեւաւորուիլը հնարաւոր չէր դառնար։
