Դէպի Հնդկաստան աշխատանքային այցելութեան ծիրէն ներս, Հայաստանի Արտաքին գործոց նախարար Արարատ Միրզոյեան այցելեց Մումպայ, որ կը համարուի այդ երկրի ելմտական կեդրոնը։ Ան այց մը կատարեց Մումպայի հայկական առեւտրային գրասենեակը, որ կը գործէ Հայաստանի տեղւոյն պատուոյ հիւպատոսութեան առընթեր։
Մեծի Տանն Կիլիկիոյ Տ.Տ. Արամ Ա. Կաթողիկոսը նախընթաց օր Անթիլիասի մէջ հիւրընկալեց Պէյրութի մօտ Հայաստանի դեսպան Վահագն Աթաբէկեանը։ Զրոյցի տեւողութեան շօշափուեցան Հայաստանի, Արցախի եւ Լիբանանի հրատապ օրակարգին վերաբերեալ զանազան հարցեր։
Հայաստանի ընդդիմութիւնը այս օրերուն յամառօրէն յառաջ կը տանի բողոքի նոր ալիք մը, որու դրսեւորումները զգալի կը դառնան՝ մանաւանդ մայրաքաղաք Երեւանի կեդրոնին, ուր յաճախ առօրեան դուրս կու գայ բնականոն հունէն։
Հանրապետութեան նախագահը երէկ երեկոյեան ընթրեց Թուրքիոյ ոչ-իսլամ փոքրամասնական համայնքներու հոգեւոր առաջնորդներուն եւ աշխարհական վարիչներուն հետ:
Ամեն. Ս. Պատրիարք Հօր առընթեր, հրաւիրեալներու շարքին էին Թրքահայ վաքըֆներու միութեան ատենապետ Պետրոս Շիրինօղլու եւ Սուրբ Փրկիչ Ազգային հիւանդանոցի հոգաբարձութեան փոխ-ատենապետ Հերման Պալեան:
Անգարայի հաւաքոյթը ընթացաւ ջերմ մթնոլորտով, մասնակիցներու կարգին էին Կրօնից տեսուչ փրոֆ. Ալի Էրպաշ, նախարարներ եւ պետական աւագանիէն բարձրաստիճան պաշտօնատարներ: Նորին Ամենապատուութիւնը ուշ երեկոյեան հանդիպում մըն ալ ունեցաւ Ներքին գործոց նախարար Սիւլէյման Սոյլուի հետ:
Նոթրը-Տամ-տը-Սիոն ֆրանսական լիսէին մէջ երէկ երեկոյեան բացուեցաւ եզակի ցուցահանդէս մը, որ կը կոչուի «Ֆրանսերէնը՝ որպէս քաղաքային հայելի»։ 1850-1950 թուականներու կտրուածքով հրապարակուած գովազդներու համայնապատկերին վրայ մատուցուած է այս ցուցահանդէսին իսկապէս հետաքրքրական նիւթը, որ լոյս կը սփռէ Օսմանեան կայսրութեան ժամանակ ֆրանսերէնի հասարակական կեանքէն ներս ունեցած դերակատարութեան վրայ։
Էրտողան հեռաձայնով զրուցեց Վլատիմիր Փութինի հետ, որ երէկ հիւրընկալեց Անթոնիօ Կութերեսը:
Ըստ Պլինքընի, Ռուսաստան լուրջ չի վերաբերիր դիւանագիտական լուծման ուղղեալ բանակցութիւններու նկատմամբ:
Հայաստանի Արտաքին գործոց նախարար Արարատ Միրզոյեան Նոր Տելհիի մէջ հանդիպում մը ունեցաւ Հնդկաստանի վարչապետ Նարենտրա Մոտիի հետ։ «Ռայսինայի երկխօսութիւն» համաժողովի շրջանակներէն ներս տեղի ունեցաւ այս հանդիպումը։
Հայաստանի Անվտանգութեան խորհուրդի քարտուղար Արմէն Գրիգորեան երէկ շփումներ ունեցաւ Լոնտոնի մէջ, ուր տեսակցեցաւ Անգլիոյ Ազգային անվտանգութեան խորհուրդի քարտուղար սըր Ստեֆըն Լովկրովի հետ։
Ամերիկայի Միացեալ Նահանգներու պետական քարտուղար Էնթընի Պլինքըն յայտարարեց, որ իր երկիրը հանդէս կու գայ Լեռնային Ղարաբաղէ ներս Ատրպէյճանի եւ Հայաստանի միջեւ առկայ հակամարտութիւնը երկարաժամկէտ սկզբունքով լուծելու ի նպաստ, ինչպէս նաեւ դէմ է այս առումով միակողմանի քայլերու։
Մեծի Տանն Կիլիկիոյ Տ.Տ. Արամ Ա. Կաթողիկոսը շաբաթավերջին Անթիլիասի մէջ հիւրընկալեց Հայկական բարեգործական ընդհանուր միութեան (ՀԲԸՄ) կողմէ պատուիրակութիւն մը։ ՀԲԸՄ-ի Կեդրոնական վարչութեան նախագահ Պերճ Սեդրակեանի եւ Լիբանանի մասնաճիւղի ատենապետ Ժերար Թիւֆէնքճեանի կողմէ գլխաւորուած պատուիրակութեան կազմին մէջ էին միութեան զանազան մարմիններու ներկայացուցիչներ։
