Հայաստանեայց Առաքելական Եկեղեցին երէկ նշեց Ս. Թարգմանչաց տօնը։ Այս առթիւ յիշատակուեցան Թարգմանիչ վարդապետները՝ մանաւանդ Ս. Սահակ Պարթեւ Հայրապետն ու հայոց տառերու գիւտարար Ս. Մեսրոպ Մաշտոցը։
Երէկ, Ղալաթիոյ Ս. Գրիգոր Լուսաւորիչ եկեղեցւոյ մէջ նշուեցաւ Ս. Թարգմանչաց տօնը՝ հանդիսապետութեամբ Տ. Յովակիմ Վրդ. Սերովբեանի, որ մատոյց Ս. Պատարագը եւ տուաւ օրուան պատգամը։ Ներկայ էին նաեւ Տ. Սարգիս Աւ. Քհնյ. Գույումճեան եւ Տ. Շիրվան Քհնյ. Միւրզեան։
Շիշլի մարզակումբի վարչութեան ատենապետ Ալէն Թեքպըչաք, որ ներկայիս կը գտնուի Ամերիկայի Միացեալ Նահանգներու մէջ, երէկ ընդունուեցաւ Նիւ Եորքի մօտ Թուրքիոյ աւագ հիւպատոս Մուհիտտին Ահմէտ Եազալի կողմէ։
Մեր համայնքէն Սարին Պայծառ Արսլան յաջողութեամբ աւարտած է «Մետիփոլ» համալսարանի բժշկական ֆաքիւլթէն։ Ան Պաղճըլարի համանուն հիւանդանոցէն ներս ասպարէզի առաջին քայլերը առած է՝ ներքին հիւանդութեանց ուղղութեամբ։
Համայնքային շրջանակները այս շրջանին կ՚ողջունեն մեր երիտասարդներէն Թալիա Արապօղլուի յաջողութիւնը. ան աւարտած է «Հալիչ» համալսարանի բժշկական ֆաքիւլթէն։
Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան երէկ երեկոյեան մասնակցեցաւ Ֆրանսայի Ազգային տօնին առթիւ քաղաքիս մէջ սարքուած պաշտօնական ընդունելութեան։
Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան երէկ ընդունեց ճարտարապետ Վազգէն Պարընը, որ այս շրջանին կը զբաղի հոգելոյս Տ. Գարեգին Արք. Պեքճեանի շիրմի նախագծմամբ ու պատրաստութեամբ։
Ամեն. Ս. Պատրիարք Հօր օրհնութեամբ եւ Արէտ-Մոնիք Երկանեան ամոլի նուիրատուութեամբ՝ ծրագրիրը կը համակարգուի Արի Չոլաքի կողմէ:
Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան շաբաթավերջին ցաւակցական այցելութիւն մը տուաւ Կիւլմէզկիլ ընտանիքին։
Հայաստանի Կրթութեան, գիտութեան, մշակոյթի եւ մարմնամարզի նախարարութեան նախաձեռնութեամբ կազմակերպուած «Գիտելիքի կամուրջ» ծրագիրը արդէն ընթացքի մէջ է Երեւանէ ներս։
