Երեւանի մօտ հաւատարմագրուած խումբ մը դեսպաններ վերջերս այցելեցին Մատենադարան, ուր կատարեցին շրջայց մը, որու ընթացքին ծանօթացան մշտական ու ժամանակաւոր ցուցադրութիւններուն։ Օտարերկրեայ դիւանագէտները մասնաւոր ուշադրութեան առարկայ դարձուցին Մատենադարանի վերականգնման բաժինն ու արխիւային վաւերագրերու պահոցը։
Շաբաթավերջին Օսմանպէյի մէջ յարգանքի ցոյց մը տեղի ունեցաւ՝ ի յիշատակ նահատակեալ լրագրող-հրապարակագիր Հրանդ Տինքի։ Իր հիմնադրած «Ակօս»ի նախկին խմբագրատան շէնքին առջեւ, հանրահաւաքի մը ձեւաչափով նախատեսուած էր այս ցոյցը, որու մասնակիցները իրենց բողոքի ձայնը բարձրացուցին՝ Հրանդ Տինքի ոճրագործին՝ Օկիւն Սամաստի բանտէն ազատ արձակուելուն դէմ։
ԵԱՀԿ-ի Խորհրդարանական վեհաժողովին նստաշրջանը շաբաթավերջին տեղի ունեցաւ Երեւանի մէջ:
Ըստ Նիկոլ Փաշինեանի, Հայաստան եւ Ատրպէյճան տակաւին կը խօսին դիւանագիտական ամենատարբեր լեզուներով:
Հայաստանի արտաքին գործոց նախարար Արարատ Միրզոյեան վերջին օրերուն աշխատանքային այցելութիւն մը տուաւ Պահրէյն, ուր մասնակցեցաւ Մանամայի երկխօսութեան գագաթաժողովին։ Ռազմավարական ուսումնասիրութիւններու միջազգային կաճառին կողմէ կազմակերպուած այս հաւաքոյթը համախմբեց աշխարհի բազմաթիւ երկիրներէն ղեկավարներ եւ բարձրաստիճան պաշտօնատարներ։ Արարատ Միրզոյեան այս հաւաքոյթի ընթացքին ներկայացուց՝ Հայաստանի կառավարութեան կողմէ մշակուած «Խաղաղութեան խաչմերուկ» ծրագիրը։
Երեւանի «Առնօ Բաբաջանեան» սրահի երդիքին տակ շաբաթավերջին տեղի ունեցաւ սփիւռքահայ հասարակական գործիչ ու գրող Վիգէն Յովսէփեանի բանաստեղծութիւններու առաջին գիրքին շնորհանդէսը։ Ամերիկայի Միացեալ Նահանգներու մէջ կը բնակի Վիգէն Յովսէփեան, որու բանաստեղծութիւններու ժողովածոն կը կոչուի՝ «Աստղերու հաւատքով»։
Անգլիոյ Եւրոպայի հարցերով նախարար Լէօ Տոքերթի այսօր տարածաշրջանային այցելութեան մը կը ձեռնարկէ դէպի Հարաւային Կովկաս։ Ուղեւորութեան առաջին կանգառը կը հանդիսանայ Երեւան, ուր ան կը հիւրընկալուի ամենաբարձր մակարդակի վրայ։
Թուրքիոյ ոչ-իսլամ փոքրամասնութեանց դպրոցներուն պատասխանատուները երէկ Եուսուֆ Թեքինի հետ տեսակցեցան՝ Պէյօղլուի Ուսուցչաց տան երդիքին տակ:
Իսթանպուլի երեսփոխան տքթ. Սեւան Սվաճըօղլուի ջանքերով կազմակերպուած հանդիպման ընթացքին համայնքային վարիչները ներկայացուցին առկայ հարցերու կարգաւորման շուրջ իրենց մտահորիզոնը՝ առաջարկելով նաեւ գործնական լուծման շարք մը տարբերակներ։
Բարձր մակարդակի ժամադրութիւնը առիթ ընձեռեց կարծիքի փոխանակումներու դրական մթնոլորտի մը, որու ընդմէջէն բիւրեղացան հրատապ առաջնահերթութիւններն ու անոնց նկատմամբ պետութեան վերաբերմունքին ազդանշանները։
Լենա Ենիեորկան, Աքսել Թոփալեան, Մկրտիչ Արծիւեան եւ Մանուկ Էօղէր թարգման հանդիսացան թրքահայ շրջանակներու սպասումներուն՝ մինչ հաւաքի յայտագիրը գործադրուեցաւ Եւա Օրագեանի հանդիսավարութեամբ։
Ազգային կրթութեան նախարարին ժողովի ատեն ծաւալուն թղթածրար մը յանձնուեցաւ՝ պոլսահայ վարժարաններու ցանցի դիմագրաւած ծանր մարտահրաւէրներուն կապակցութեամբ։
Երէկ, Հայաստանի վարչապետ Նիկոլ Փաշինեան ընդունեց Վրաստանի պաշտպանութեան նախարար Ճուանշէր Պուրչուլածէի կողմէ գլխաւորուած պատուիրակութիւնը, որ պաշտօնական այցելութիւն մը տուաւ Երեւան։ Կը հաղորդուի, որ վարչապետը նշեց, թէ Հայաստան-Վրաստան յարաբերութիւնները կը շարունակեն աշխոյժ զարգանալ։
Արդարադատութեան միջազգային ատեանը երէկ արձակեց վճիռ մը, որով Ատրպէյճանը կը պարտաւորուի ապահովել Լեռնային Ղարաբաղի հայերու վերադարձի իրաւունքը։ Լահէյի միջազգային դատարանը այս որոշումը տուաւ՝ Հայաստանի դիմումին հիման վրայ՝ Ատրպէյճանի դէմ միջանկեալ միջոց կիրառելու պահանջով։
Հայաստանի վարչապետ Նիկոլ Փաշինեան երէկ հերթական անգամ խօսեցաւ Ատրպէյճանի հետ առկայ անվստահութեան կապակցութեամբ։ 2024 թուականի պետական պիւտճէի նախագծին վրայ ծաւալուած քննարկումներու ծիրէն ներս, Հայաստանի Ազգային ժողովի ամպիոնէն երէկ Նիկոլ Փաշինեան ունեցաւ ելոյթ մը, որու ընթացքին ըսաւ. «Եթէ Ատրպէյճանի հետ խաղաղութեան սկզբունքները համաձայնեցուած են, ապա ի՞նչ է խնդիրը, ինչո՞ւ համար չենք երթար, ինչո՞ւ չենք ստորագրեր խաղաղութեան պայմանագիրը։
